Ka scholarship ia ki khynnah pule ka thain War Jaintia
Ha ka sien kaba nyngkong ba ka seng trei kam bhalang kala mih shakhmat ban tyrwa ban ai da ka scholarship ia ki khynnah pule kiba pule haka kyrdan klas V, VII bad IX jong ka thain War Jaintia ne Amlarem Sub Division.
Kane ka seng kaba la shim ia kane ka sienjam ka dei ka War Jaintia Student’s Union (WJSU) bad ka jingthmu kalong ban ai mynsiem bad pynshlur iaki khynnah haka kam pule puthi.
![](https://www.syllad.com/wp-content/uploads/2024/09/JIT-Vacancy-823x1024.avif)
Katkum ka shithi sha baroh ki Principal, Headmaster/ Head Teacher, ka WJSU kala pyntip ba Education Committee ba kan ai iaka ‘First War Jaintia Scholarship Examination 2024’ ha ka taiew kaba ar jong u bnai Nohprah (December) 2024. Ban ioh pdiang ia kane ka scholarship, ki khynnah pule kin hap ban iakhun iaka eksamin bad yn pynbna haka 11 tarik Naiwieng (November) 2024 iaka tarik eksam.
Kane ka eksamin scholarship kan long ia ki khynnah ha ka kyrdan Lower Primary, Primary bad Upper Primary School na ka bynta ki 6 tylli ki sobjek, kata ka English, Mathematics, Science, Social Science, General Knowledge bad Khasi.
Ia ka eksamin la phiah ha ki 3 bynta, kawei kadei ia kiba la pass Class IV bad kiba dang pule mynta ia ka Class V, kaba ar ia kiba pass Class VI bad kiba dang pule Class VII, bad ka ia kiba la pass Class VIII bad kiba dang pule Class IX mynta u snem.
Ka Education Committee kan buh kawei ka jaka thoh eksamin na ka bynta kawei ka cluster bad ia ka eksamin yn pynlong da ka Optical Mark Recognition (OMR) basis bad katkum ka syllabus jong ka MBOSE.
Nalor kata, yn jied 110 ngut ki khynnah kiba ioh ia ka Scholarship na kawei pa kawei ka kyrdan bad baroh 330 ngut ki khynnah kin ioh pdiang ia ka khusnam da ka song pisa bad ki tiar.
Ka Education Committee ka la thaw ruh ia ka komiti kaba tbit ban buh ia ki jingkylli bad ban pynbeit ia ki Examination Paper.
Ia ka Result yn sa pynbna 4 sngi hadien ba la wai ka eksamin bad ia ka jingialang sam khusnam yn pynlong ha ka 22 tarik Nohprah 2024 ha ka por 11:30 mynstep ha Enowel Hall, Amlarem.
Leave a Reply