Khot iakren u CM ia ka KSU namar ka jingkhynra pyrshah ia ki nongbylla bar jylla
U Myntri Rangbah ka Jylla Conrad K Sangma u la khot iakren ia ki nongialam ka Khasi Students’ Union (KSU), 19 tarik Naitung hadien ka jingshim rai jong ka seng ban nangpynjur ia ki jingkhynra pyrshah ia ki nongtrei bylla bar jylla ki bym don ia ki kot ki sla kiba biang hapoh Rilum Kasi Jaintia.
Ka Deputy Commissioner ka East Khasi Hills, ka Kong RM Kurbah lyngba ka shithi sha u General Secretary ka KSU u Samla Donald V Thabah ka la ong ba na ka liang u CM ka Jylla u la pynpaw ba u kwah ban iakynduh ia ki nongialam jong ka Seng KSU lashai ka sngi Thohdieng hapoh ka ophis treikam jong u ha Secretariat ha ka por 12 baje mynsngi.
![](https://www.syllad.com/wp-content/uploads/2024/09/JIT-Vacancy-823x1024.avif)
Lah ban kdew ba ka KSU naduh kine ki khyndiat sngi ba la dep ka la pynlong ia ki jingkhynra bad talasi pyrshah ia ki nongtrei bylla bar jylla ki bym don ia ki kot ki sla kiba biang, kata khamtam ia ka work permit bad labour licence da kaba pynieng ruh haduh laitylli ki khyrdop Inner Line Permit (ILP), kata ha Pahammawlein, Ri Bhoi, ha Umstain, East Jaintia Hills bad ha Athiabari, West Khasi Hills.
Ka Seng ka la kam ruh ba haduh palat 2500 ngut ki nongbylla bar jylla ki bym shym la lah ban pyni ia ki kot ki sla kiba biang bad kiba trei ha kiba bun ki jaka hapoh Rilum Khasi Jaintia ki la shah pynphai noh sha ki jaka kiba ki wan hadien ki jingkhynra kiba la long ha kine ki 12 sngi kiba la dep.
Ha ka sngi Balang ba la lah u president ka KSU u samla Lambokstarwell Marngar u la pynbna ba ka seng ka la shim ia ka rai ban nangpynjur shuh shuh ia ki jingkhynra kum shibynta ban pynpaw pyrshah ia ka jingpulom jong ka sorkar Jylla ban pyntreikam ia ki kyndon ain kiba la don lypa, kum ka Meghalaya Residents Safety and Security Act (MRSSA), 2016 nalor ka jingbanbor ia ka sorkar Pdeng ba ka dei ban pyntreikam noh mardor ia ka Inner Line Permit (ILP) khnang ban lah ban khanglad ia ka jingwan rung kyrthep jong ki bar jylla shapoh kane ka jylla.
Leave a Reply