Reservation Policy: Tyrwa ka SSAC ban bhah 27% ia ki longiing baduk, mar 30 ia ki Khasi -Jaintia bad Garo
Ka 19-South Shillong Advisory Committee (SSAC) ba la ialam da u MLA ka BJP u Sanbor Shullai ha ka 15 tarik Naitung ka la tyrwa ba dei ban bhah noh mar 30% ia ki paid Khasi – Jaintia bad Garo katba 27% dei ban bhah kyrpang noh na ka bynta ki longiing kiba duk.
“Ka SSAC ha ryngkat ka jingiamir jingmut bad ki kynhun kiba don bynta ka la tyrwa ban pynshong nongrim ia ka bhah katkum na ka jingdon paid, kata da kaba pynshong nongrim na ka khanasamari jong u snem 2011, bad kaba iaid ryntih bad ka Roster System ba la pyntreikam da ka sorkar Meghalaya,” ong u Bah Shullai ha ka dorkhas ba la phah sha ka Expert Committee halor ka State Reservation Policy.
![](https://www.syllad.com/wp-content/uploads/2024/09/JIT-Vacancy-823x1024.avif)
U la ong ruh ba ka Committee ka la aijingmut ba ha ka jingbhah kam dei ban long ha ki san bynta, kata kaba kynthup 30% na ka bynta ki Khasi -Jaintia, 30% ia ki Garo, 27% ia kiba wan na ki longiing baduk, 6% ia kiwei pat ki ST/SC & OBC bad 7% ha ka unreserved category.
Nalor kata u la bynrap ba na ka 27% ka bhah na ka bynta ki longiing baduk, ka committee ka tywa ba 87% ban bhah ia kiba duk na ki jaidbynriew Khasi -Jaintia bad Garo, 6% ia kiba duk kiba dei na kiwei pat ki ST bad SC (3%) & OBC (3%) bad 7% ia kiba duk na ka unreserved category.
“Na ka 27% ka bha naka bynta kiba duk, dei ban bhah 87% na ka bynta kiba duk kiba dei na ka jaidbynriew Khasi, Jaintia bad Garo bad ka 6% kaba sah na ka bynta kiwei pat ki ST, SC & OBC bad 7% na ka bynta ka unreserved category khnang ba kan long ka jingmyntoi na ka bynta ki longiing baduk bad ki nongshong shnong na ki thain nongkyndong kiba ju shah kyntait ha ki lad ioh kam ioh jam lyngba ka bhah thungkam. Kine kiba duk (BPL) ki kynthup ia ki khun jong ki nongkamai kali, nongdie madan, nongtrei iingbriew, nongtrei bylla bad ki nongtrei kontrak, Asha, Aganwadi, nongrep bad ki nongbylla sngi, bad ym dei satia ban kynthup ia ki nongtrei sorkar ha katei ka thup.”
U Bah Sanbor u la ong ruh, “Na kine ki santylli ki thup, 10% dei ban bhah kyrpang na ka bynta ki briew kiba don jingduna ha ki dkhot met, bad na ka bynta kito kiba pawkhmat ha ka liang ka sports, arts bad culture.”
Kumjuh une u Myntri sorkar barim u pyntip ruh ba ka advisory committee ka la aijingmut ruh ba dei ban kynthup ia baroh ki bar jylla kiba la shong la sah slem bah ha kane ka jylla ban pynhap ha ka thup OBC bad ia kito kiba dei ban hap ha ka Schedule Tribe caster dei ban pynhap ha ka SC category. Nalor kata ka advisory committee ka la aijingmut ruh ban bhah 3% na ka bynta ki OBC & SC bad 3% na ka bynta kiwei pat ki ST.
U la ong ba ka advisory committee ka la aijingmut ruh ba ka jingbym don ki kyrtong kiba dei na kiwei pa ki ST, SC, OBC bad unreserved category ha kino kino ki district, kumta ruh ia kitei lah ban pynhap da kito kiba wan na ki longiing baduk kiba na ka jaidbynriew Khasi -Jaintia ha baroh ka Ri Lum Khasi Jaintia, kata kaba kynthup ia ka Ri Bhoi district bad ia ki Garo hapoh Garo Hills na ka bynta ki kam kiba dei ha ki district level ne sub divisional level.
Shuh shuh ka advisory committee lyngba u Bah Sanbor ka la aijingmut ruh ba ha ki kam hapoh ki district level ne sub divisional, na ka 87% ka jingbhah kaba kyllum lang, 50% dei ban bhah ia kiba wan na ki longiing baduk kiba dei ki Khasi-Jaintia ha baroh ka Ri Lum Khasi Jaintia district, kata kynthup ia ka Ri Bhoi, bad ki jaidbynriew Garo ha Garo Hills, kata da kaba kyntu ruh ia ka sorkar jylla ka dei ban bishar thymmai ia ka bhah thungkam ha ka jylla man la ka 10 snem.
Leave a Reply