1 klur 56 lak pynioh skhim surok u MLA ka Mylliem ha lai tylli ki shnong lyngba ka RIDF

Syllad | The Rising MeghalayaJune 5, 2019

SHILLONG: U Bah Hamletson Dohling, MLA ka Mylliem Constituency uba long ruh u myntri pynroi sor ula buh maw nongrim na ka bynta ka jingshna pynbha ia ka surok iaid kali ha ka shnong Mawnianglah na ka bynta ka Mawnianglah Mihngi, Mawnianglah Sepngi bad Kynthawlang ha Upper Shillong haka sngi ba ar.

Kane ka surok kaba jrong 2.025 km bad yn shna lyngba ka skim Rural Infrastructure Development Fund (RIDF) – XXIV.

Ki don lai tylli ki shnong kiba la pynrung ban ioh skim shna surok lyngba ka RIDF ha ka mang jinglut kaba long T. 1,56,29000 /- (Shi Klur Sanphew Hynriew Lak Arphew Khyndai hajar). Nalor ka shnong Mawnianglah, ki don sa ar tylli ki shnong kiba shen kin ïoh surok rong lyngba kane ka skhim RIDF kata ka shnong Baniun bad ka Sawmer shiteng.

Ha kane ka jingbuh maw nongrim u Myntri pynroi sor ka jylla ban sdang ka jingtei surok la ïadonlang u ES Lyngdoh, Executive Engineer PWD (Roads), Shillong South Division, ki ophisar ka tnad PWD, ki rangbah shnong na kine ki shnong bad shnong ba marjan, ki seng samla, ki seng longkmie bad ki paidbah nongshong kine ki shnong.

Na ka liang u bah Hamlet u la pynpaw ba bun ki surok ha ka constituency khamtam ha ki shnong ba kham kyndong ki bun kiba la jot lut donkam ban pynbha. “Ha ki snem tam kum u nongmihkhmat ka constituency nga la iai pyrshang ban pynbiang bad weng ia ki jingeh kiba u paidbah u ia kynduh bad ki paidbah nongshong ki ud halor ka jingsoh-sat ha ka leit ka wan”, u la ong.

“Ki bun ki kam kiba hap ban pyndep bad ki kam pynroi kim dei ki kam ba tang shu ong long lah ban long noh hynrei ki donkam ia ka por hynrei kum u nongmihkhmat ngan iai pyrshang ban kyntiew ia ka thaiñ bad ka constituency hi baroh kawei,” la ong u ne u myntri sorkar da kaba kyntu ia ki paidbah ki nongialam shnong ban ai ka jingiatrei lang ha ki kam bapher bapher.