1 lak thong ki pulit ban ioh kem ia kiba donkti ha ka jingpynbthei bom IED ha Iew Mawlong

Syllad | The Rising MeghalayaMarch 10, 2024

Ka Tnat pulit ka Jylla ka la thong 1 lak tyngka ia kino kino kiba aijingtip na ka bynta ban ioh kem ia ki briew kiba donkti halor ka jingjia pynbthei bom IED kaba la jia ha ka miet 9 tarik mynta u bnai hapoh Them Iew Mawlong.

U Superintendent of Police ka East Khasi Hills, u Rituraj Ravi, ula ong ba kane ka rukom pynbthei ia une u bom ka iasyriem bad ki jingbthei kiba la jia ha ki snem kiba la dep hapoh ka thain ia kiba la shim jingkitkhlieh da ka seng kieng atiar Hynniewtrep National Liberation Council (HNLC).

“Hynrei, kat haduh mynta ym pat shym la don satia kino kino ki kynhun ki ban shim ia ka jingkitkhlieh ha kaba iadei bad katei ka jingbthei bom,” u la ong.

Ha kajuh ka por u pyntip ruh ba ki pulit kila rejistar da ka suo-moto FIR halor kane ka jingjia ha Sadar Police Station hapoh ka UA (P) Act bad ka Explosive Substance Act.

“Na ka liang ka Tnat pulit ka la iaid shakhmat ban pynlong ia ka jingtohkit kaba bniah halor kane ka jingjia khnang ban ioh kem ia kito ki briew kiba donkti bad ban shim bishar katkum ka ain,” ong u heh pulit da kaba kyntu ruh ia ka jingiatreilang jong ki paidbah khnang ban ioh ia ka jingjop ha kaba iadei bad kane ka bynta.

U SP u la ong ba kane ka jingbthei bom IED ka la jia ha ka por kumba 10:30 mynmiet hapoh kawei ka iing ka bym shong briew hapoh Syndicate Bus Stand, Punjabi Lane ha Them Iew Mawlong kaba la wanrah ruh ka jingmynsaw ba malu mala ia uwei u briew uba la tip kyrteng kum u Lakhan Singh bad katto katne ki jingjulor.

Shuh shuh na ka liang u SP u kyntu ruh ia kino kino ki briew kiba aijingtip ba kim dei ban khuslai ne tieng namar yn buhrieh noh ia ka kyrteng ka jong ki.

“Ia kino kino ki jingtip kiba iadei bad kan ka jingjia ki lah ban phah lyngba ka Special Cell da kaba phone /text /WhatsApp sha une u phone nombor 9366790273 lane sha ka email ka [email protected],” ong shuh shuh une u heh pulit.