10 hajar marwei sam u Wailadmiki Shylla ha Jowai

Syllad | The Rising MeghalayaJuly 5, 2022

U MLA Jowai Ma Wailadmiki Shylla haka sngi ba Ar ula sam iaka song pisa kaba mar T.10,000/- marwei sha ki 406 ngut ki nongshong shnong ka sor Jowai kum ka shibynta ban kyrshan ban seng kam.

Kane ka song pisa ka dei na ka MLA skim, katta ka Special Rural Work Programme (SRWP) jong u snem 2019-2020.

Ïa kane ka song pisa la aiti sha ki nongïoh jingmyntoi haka jingïalang kaba la long ha Indoor Hall la Dorbar Shnong Ladthadlaboh kaba la pynïaid da u Ma Octomewot Lamin MDC JHADC.

Hashwa ka ban aiti ïaka song pisa la ïoh ka jingkren lyngkot na ki MDC ka NPP kynthup u Brightstar Chyrmang, u Lakhon Dkhar bad u Ailad Bhoi kiba la pynsngew bad pyrto ïaki kam kiba une u MLA ula leh na ka por sha ka por ban kyntiew ïaka roi ka par hapoh ka 2-Jowai Constituency.

U Wailadmiki Shylla ula ïathuh ba ïa kane ka skhim la thmu ban sam naduh une u bnai ba la dep hynrei na kiba bun ki daw kumjuh ki jingpynwit pynthut jong ki bor ka mariang la hap ban pynslem noh.

Ula ïathuh ba ïaka song pisa la aiti sha ki nongïoh myntoi lyngba ka cheque khnang ba kin thep beit sha ki Account ki jong ki bad ka jingsam da ka Cheque kan wanrah ïaka jingkhuid jingsuba haka rukom sam skhim sha ki paidbah.

Ula ong ba kane ka skhim kadei tang na bynta ki nongshong shnong kiba don ha sor Jowai lane Urban Area ymdei ban sngewthuh bakla namar shaki thaiñ nongkyndong la dep ban sam da ki tin bad ki tiar misteri, hynrei kat hapoh sor Jowai pat, bun ki briew kiba la don ki ïing bad bun kiba sah ïingwai kim donkam ïaki tin, kumta la kyrshan iaki da ka pisa ban kin sdang kano kano ka kam barit ba ria.

Ula ong, hadien ka jingktah jong ka khlam COVID-19 ki nongshong shnong ki donkam shisha ïaki lad jingïarap kaba malu mala khnang ba kin lah ban sdang ïaki kynja business rit ne petty Business.

Ula ïathuh ba kane kadei ka sien kaba ar ba ula sam ïaka skhim MLA jong u bad dangsah sa lai snem hynrei u khmih lynti ha kine ki ar lai bnai yn sdang noh ban pyntreikam ïakï skhim kiba dangsah.