10 snem tam khlem wan skul tista u nonghikai ha kawei ka shnong ha West Jaintia Hills

Syllad | The Rising MeghalayaApril 28, 2023

Uwei u nonghikai uba dei ban hikai ha kawei ka skul sorkar ha West Jaintia Hills District u khlem lah ban pyndep iaka kamram jong u bad kane ka buh jingeh ia kiwei ki para nonghikai khamtam iaki khynnah jong kane ka skul kiba dang donkam bha ban seng iaka nongrim haka jingpule puthi jong ki kum ki khynnah.

Kane ka jia long haka skul Larnai Government Lower Primary School, West Jaintia Hills District.

Une u nonghikai ba pep skul u dei uba la tip kyrteng kum u Wikiru Shylla ba na ka shnong Wahiajer. La thung ia u kum u nonghikai ha kane ka skul naduh u snem 2012 bad la kynnoh ba une u nonghikai u wan skul tang 50-60 sien.

Ka shnong jong une u nonghikai ka jngai tang hapoh 6 Kilometre na Wahiajer sha Larnai . Hynrei iaka daw ba pep skul une u nonghikai, u tip khambha ma u.

Ka Khasi Students Union, West Jaintia Hills District Unit, hadien ba kala ioh iaka jingujor naka shnong Larnai kala hiar dalade ban jurip ia kane ka skul haka sngi Thohdieng.

Ki nongialam bad dkhot ka KSU West jaintia Hills District unit haka jingiadonlang ki nongialam ka KSU Larnai Unit haka jingjurip ia kane ka skul kila lap ba une u nonghikai um ju poi skul.

Ka KSU kala ong ba na kaliang ka shnong ruh kala phah sha une u nonghikai da ka jingthoh, pynban ula leh bymsuidniew bad um shym la wan hikai sha skul.

Ka KSU kala dawa naka tnad pule puthi ka sorkar Jylla ban pynsaja ia une u nonghikai khnang ba kane ka jingpep skul jong u kan nym ktah ia kiwei ki para nonghikai bad ki khynnah skul.