10 sngi ai bor ka iing bishar ban tohkit ia u PSO ka Seng HNLC

Syllad | The Rising MeghalayaMarch 2, 2024

Ka iingbishar District and Session Judge kala ai bor iaki Pulit ka Jylla ban tohkit 10 sngi ia u Personal Security Officer (PSO) jong ka Seng kieng atiar Hynniewtrep National Liberation Council (HNLC), u Bah Storgy Lyngdoh uba la shah kem noh ha ki bor pulit ha ka step phyrngab jong ka sngi Saitjain na ka nongbah Shillong.

Ka khubor pulit ka iathuh ba hadien ba la ioh ia ka jingtip kaba bniah ki bor pulit ba kyrpang ka East Khasi Hills ki la pynlong ia ka jingkhynra bad ioh ban kem noh ia une u dkhot ka HNLC 41 snem rta napoh ka iingsah jong u na Mawlynrei, Khliehshnong, Shillong, kata hadien ba u la wan rung napoh Bangladesh.

Na ka liang ki pulit ki la ioh ban kurup noh ia kawei ka mobile phone lem bad ka SIM kaba don jingiadei napoh Bangladesh lame bad kawei ka Airtel SIM na India nalor ka SD memory kaba 1 GB.

Ka khubor pulit ka ka la ong ruh ba kui don ki khubor kiba iathuh ba une u PSO ka HNLC u donkti ha ki kam beain kum ki kam dawa pisa, ka jingpynrung dkhot bad ka jingpan jingkyrshan na ki briew na ka bynta ban lah ia ki kam pyrshah ri bad kiwei pat ki kam pyntriem.

Lah ban kdew ba u Strong Lyngdoh u dei napdeng ki laingut ki PSO, kiba la wan ban synran ia ki nongialam ka HNLC ha ka por ka jingiakren iasuk bad ka sorkar ha une u snem ba la dep.

Shuh shuh kane ka jinglong jingman ka la wan long ruh hadien ki jingioh lum khubor ba kane ka Seng ka la pynjur biang ia ki kam dawa pisa na ki nongkhaii ha ka thain Ri Lum Khasi bad Jaintia.