10 sngi ai por Dorbar ki Waheh Kur Ri Jaintia iaka JHADC ban pynmih hukum ba ithuh iaki Kur, Seng bad ki nongialam

Syllad | The Rising MeghalayaJanuary 15, 2025

Ka Dorbar ki Waheh Kur Ri Jaintia haka 15 tarik Kyllalyngkot kala la leit ban pynkynmaw ia u CEM jong ka JHADC Ma Thombor Shiwat iaka jingkyrpad jong ka dorbar ban pynmih noh ia ka jingthoh ne ka Executive Order ban ithuh ia baroh ki Kur, ki nongkitkam ne ki Waheh jong ki Sengkur, Dorbar Kur hapoh u pud ka JHADC.

Ha kane ka jingleit iakynduh la ialam da u president Ma Khroo L Pariat, Vice President Ma Pyrkhat Shylla ryngkat ka jingsynran lang ki longkmie.

Ka Dorbar ki Waheh Kur Ri Jaintia, kala ai por 10 sngi, kata haduh 25 tarik Kyllalyngkot 2025 iaka JHADC ban pynmih iaka hukum ne ka jingthoh halor kane ka jingkyrpad jong ka Dorbar.

U Khroo L Pariat haba kren sha ki lad pathai khubor ula pynpaw ka jingsngewdiaw halor ka jingsngap jar bad ka jingbym burom ka Executive Committee JHADC halor ka jingkyrpad jong ka dorbar kaba kala dep aiti lyngba ki jingthoh na ka por sha ka por naduh u snem 2022 haduh u snem 2024.

Ula ong ba ka jingkyrpad ka jong ka dorbar ka long ban tehsong iaka jaitbynriew kaba shim iaka Kur bad seng Jait naka Kmie khamtam ha kine ki sngi ba ka hok longbriew manbriew kala shah tynjuh na baroh ki liang.

Nalorkata ula ong ruh ba ka dorbar ka la kyrpad iaka JHADC ban pynmih hukum sha baroh ki Waheh shnong, ki Dolloi hapoh u pud u sam jong ka JHADC ban ym ai syrnot ia kino kino ki bar jylla na ki Jaitbynriew riewlum ne ki bar Jylla ki bym dei trai ri na kane ka jylla Meghalaya bad Ri India.

Ia kane ka hukum dei ban phah sha u Deputy Commissioner jong ka West Jaiñtia bad East Jaiñtia Hills District na ka bynta ba kin ai ia ka syrnot Schedule Tribe katkum ka hukum ka JHADC.

Halor ka jingai por jong ka Dorbar na ka liang u CEM Thombor Shiwat kan dang shimpor ban pyndep hynrei na ka liang ka konsil kala dep ban iakren hapoh ka EC ban ai daka jingthoh sha baroh ki waheh shnong ban long kiba phikir haba ai NOC ban ialeh Schedule Tribe khamtam iaki jaitbynriew bymdei ki trai ri trai muluk.