10 sngi ai por ki samla pule ia ka sorkar ban pyllait ia ka scholarship ne mad ia ka jingiakhih

Syllad | The Rising MeghalayaJanuary 3, 2024

Ki nongialam ka North Eastern Hill University Students’ Union (NEHUSU) ha ryngkat ka jingiasnohkti lang jong ka Seng Hynniewtrep Youths Council (HYC) Education Cell ha ka sngi Balang ki la mih shakhmat ban pynlong da ka jingiakhih kaba jai jai hakhmat ophis ka MBOSE bad ai por 10 sngi ia ka sorkar jylla ba ka dei ban pyllait noh ia ka Scholarship jong ki samla pule kaba dei jong u snem 2022-2023.

Ha kane ka jingiakhih la sakhi ruh ia ki plakad kiba thoh “Shano ka lawei ki khynnah pule wat ia ka hok ka jong ki ruh ki leh bym suidniew”.

Haba kren sha ki lad khubor u General Secretary ka NEHUSU u Bah Banpynbiang Riang u la ong ba ka jingiakhih mynta ka sngi ka dei halor ka jingpynslem ka sorkar jylla ban pyllait ia ka scholarship ki samla pule, bad u la kyntu ia ka sorkar ba ka dei ban pyllait kloi ia ka scholarship hapoh ka shiphew sngi lem kumta ki samla pule kin pynlong da ka jingiakhih kaba tyngeh. Nalor kata u la ong ruh ba lada ka sorkar kan tynjuh than ia ki samla pule kan sa poi ka por ba kin buh noh ia u khulom bad ban rah da ki tiar ialeh.

Katba na ka liang u President ka Seng HYC u Bah Roykupar Synrem uba la wan ban kyrshan lem ia ka jingdawa jong ki samla pule u la ong ba ka sorkar ka dei ban pyllait noh ia ka scholarship namar ba bun ki samla pule ki wan na ka longiing kaba duna ka ioh ka kot bad kane ka bai scholarship kan iarap ia ki ba kin lah ban bteng ia ka jingpule ki jong ki.

Nalor kata ula ong ruh ba ka Seng ka ai ka jingkyrshan kaba pura ia ka rai jong ki samla pule ban ai por ia ka sorkar jylla bad lada ka sorkar kam shim khia halor kane, ka seng kan sa shim da kiwei ki sienjam.