10 tarik yn khang sa lai tylli ki iew ha Jowai

Syllad | The Rising MeghalayaJanuary 7, 2022

U President Synjuk Waheh Chnong Jowai ma Alan Niangti ula pyntip ba haka 10 tarik Kyllalyngkot (January) 2022 ki lai tylli ki iew ha Jowai kiba kynthup iaka iew Seinraij, iew Shyiap jong ka Jowai Presbyterian Church bad iew CNI ne iaw chor kin khang khyrdep.

U ma Alan Niangti ula ong ki Market Committee jong kine ki iew kila kloi ban ai ka jingiatreilang bad ka synjuk ban khang iaki iew ban pynkhuid ïaki ñiut ki ñier kiba la sahkut naduh u bnai Nohprah 2021.

Kum ban shu pynkynmaw ba ka daw ba sah kut ki ñiut ha baroh ki iew ha Jowai ka dei namar ba sangeh ka Jowai Municipal Board ban lum ban lang iaki ñiut hadien ba pyrshah ki nongshong shnong hapoh kala lama jong ka Elaka Nartiang Coordinate Committee bad ki shnong ba marjan iaka jingbret ñiut ha Mooshutdai Mookabeng kaba don hajan ka shnong Sohphoh halor ka jingjakhlia ka sawdong sawkun ka mariang.

Hynrei hadien ka jingiakren pynbeit ka bor synshar district, kane ka jingbret ñiut ha katei ka jaka ba thymmai kala iaid shakhmat naduh 6 tarik Kyllalyngkot bad ka JMB kala lah ban pynkhuid iaka ñiut hakhmat DC ophis bad ha lad Thomas Jones Synod College.