107 kilo rah uba jop rah Mookhrah, rakhe ka KCC Seinraij iaka lyngkhuh sngi iap U Kiang Nangbah

Syllad | The Rising MeghalayaDecember 29, 2024

Kum shibynta ka jingkynmaw burom iaka lyngkhuh sngi iap ba 162 U Kiang Nangbah Khlawait ka Ri 12 Dolloi, ka Khynroo Khyllood Committee Seinraij Jowai haka 28 tarik Nohprah kala pynlong iaka jingiakop ialehkai tynrai ne Traditional Sports ba kynthup ka iadat mawpoin, rah Mookhrah, Iasiat khnam bad ka iatan tyllai.

Ka Khynroo Khyllood Committee kala shim iaka sienjam ban pynlong ia kane ka Traditional Sports ka long ban pynneh pynsah ia kine ki jait jingialehkai kiba U Kiang Nangbah u ju sngewtynnad ban pynbyrngia haka por jinglong khynnah ka jong u.

Ha kane ka jingiakop la wan iashim bynta da ki dorbar shnong bapher bad iaka jingiakop la pynlong ha madan Dulong katba iaka Iasiat khnam la pynlong ha madan Madiahkmaiblai.

Haba phai shaka jingiakop rah Mookhrah kala long kaba shongshit ha kaba ki nongiashim bynta kila sei bad pyni iala ka jong ka jong ka sap ka buit ka bor ban kynrong ban rah iaki Mookhrah kiba don haki jingkhia bapher bapher kat haduh ba la poi ka bynta ban sah satang arngut ki nongiashim bynta kiba la lah ban rah ia u Mookhrah ba don haka jingkhia kaba 107 kilo tam.

Haka jingiakop rah Mookhrah u Da-O-hi Dhar na Ialong ula rah iaka nam lahduh katba u C. Sari na Mukhla ula wan ba ar.

Haka jingiakop dat Mawpoin naka liang ki kynthei iaka nam lahduh la rah da ka Panaliar ba ar Dulong. Katba na ka liang ki shynrang la rah da ka Panaliar, kaba wan ba ar ka Lompyrdi Iongpiah.

Haka jingiakop tan tyllai, naka liang ki kynthei la rah da ka Dulong, ba ar ka Panaliar. Katba na ka liang ki shynrang la rah da ka Mukhla-A bad ba ar da ka Mukhla B.