11 tarik Kyllalyngkot kan kut ka electronic bidding ka PNGRB ban pynpoi gas shet jingshet ha ki jaka sor

Syllad | The Rising MeghalayaDecember 10, 2023

Ka Petroleum & Natural Gas Regulatory Board (PNGRB) kala khot iaka Electronic Bid kaba la sdang naduh ka 13 tarik u Risaw 2023 bad kan kut ha ka 11 tarik u Kyllalyngkot 2023 na ka bynta ki 7 tylli ki GAs hapoh jong ka 12th CGD Bidding Round bad ha ka 23 Rymphang 2024 na ka bynta ka Mizoram GA, bad na ka liang ka PNGRB ka thmu ruh ban pyndep ia ka jingaiti ia ki kam ha u Rymphang ne u bnai Lber 2024.

Kane ka thong jong ka Petroleum & Natural Gas Regulatory Board (PNGRB) ka long ban kynjoh iaka 100 percent ia ka City Gas Distribution ne ban pynpoi gas ha manla ki sorbah lait noh ki dewlynnong.

Ha ka jingpyrshang ban kynjoh sha ka 100% ka jingpynpoi gas haki jaka bapher bapher hapoh ka ri ban kyntiew ia ka City Gas Distribution (CGD) network, ka Petroleum & Natural Gas Regulatory Board (PNGRB) haka 8 tarik Nohprah, kala pynlong ia ka Road Show na ka bynta ka 12th CGD Bidding Round ha ka nongbah Shillong.

La plie ia kane ka jingialang ba la pynlong ha Taj Vivanta Hotel, Shillong, da u Symbud Myntri Rangbah ka jylla u Bah Sniawbhalang Dhar ha ka jingdonlang u Dr. Anil Kumar Jain, Chairperson PNGRB, u Additional Chief Secretary ka jylla u Shakil P Ahammed, board member bad “Secretary na ka PNGRB bad kiwei kiwei.

Kane ka 12th CGD Bidding Round ka thmu ban pynurlong ia ka jingangnud kaba 100% ban pynpoi ia ka natural gas ha ka ri da kaba ai ia ka 8 Geographical Area ka ban kynthup ia ki 6 tylli ki jylla jong ka Thaiñ Shatei Lam Mihgi bad ki Union Territory jong ka Jammu & Kashmir bad Ladakh.

Hadien ba la dep ka12th CGD bidding round, la jan baroh ki jaka hapoh ka ri (lait noh ki dewlynnong) kin don hapoh jong ka City Gas Distribution network. Kane ka jingjop kaba khraw na ka bynta ka PNGRB kan pynioh ia ka gas shet jingshet kaba khuid sha man la ki longiing, ban kyrshan ia ki karkhana bad ki jingtreikam ha ka khaii pateng, ka leit ka wan kaba long ka jingjop ba khraw na ka bynta ban pynurlong ia katei ka thong khamtam ha kaban iarap ha kaban pynneh pynsah ia ka jingkhuid jingsuba jong ka mei mariang.

Ha ka jingkren u Symbud Myntri Rangbah ka jylla ula ai ka jingiaroh ia ka rukom treikam jongka PNGRB lyngba ki 11 tylli ki sienjam kiba la dep, bad ula ong ba kane kan iarap ia ka ri India bad ha ka ioh ka kot lyngba ka gas.U la ong ruh ba kane ka sienjam kan iarap ban aikam aijam, ban pynbiang ia ka gas kaba khuid ba suba bad kyntiew ia ki kam khaii pateng.

Nalor kata u Bah Dhar u la ong ruh ba ki la ithuh ia ki jingmyntoi lyngba ka jingiatreilang bad ka PNGRB na ka bynta ban buh ia ki jaka treikam na ka bynta ka Natural Gas ha ka jylla bad ruh ban buh ia ki Incubation Centres na ka bynta ki nongseng kam bad ka Skill Development na ka bynta ki samla ka Meghalaya, kata ryngkat ka jingkular ban don ia ka polisi bad ka jingkyrshan na ki bor sorkar sha ki kynhun kiba ia don bynta.

Katba u Dr. Anil Kumar Jain haba aijingkren ula pynpaw ba ka PNGRB ia mynta hi, ka pynleit jingmut ha kaban pynmih ia ka gas kaba khuid bad ia ki jaka treikam kiba iadei bad pynioh gas hapoh ka ri  khamtam ha ki jylla jong ka thain North East. U Dr. Jain u la kdew ruh halor ka jingshisha ba ka thain North East baroh kawei ka don ia ki tyllong jong ka gas bad ka jingwan poi jong ki pipeline na ki jaka kiba jngai bad ka CGD network kan dei ka ban sah jingkynmaw na ka bynta ka thain North East halor kane ka bynta.

Ha kajuh ka por u Dr. Jain ula kyntu ruh  ia ka sorkar jylla ban wanrah ia ki jingkylla ha kaba iadei bad ka jingshim khajna halor ka Natural Gas bad ban pynmih ia ka CGD policy ha ka jylla Meghalaya katkum ka draft policy kaba la pynbiang da ka MoPNG.

Kiwei pat kiba la aijingkren ha kane ka jingialang ki kynthup ia u Shakil P. Ahammed, u Suresh P Manglani u CEO na ka Adani Total Gas Limited, u Sanjay Kumar u Director (Marketing), GAIL (India) Limited bad u Ajit Kumar Thakur u CEO, Indradhanush Gas Grid Limited bad kiwei kiwei.