11 tarik yn tep don burom ia ka met ba sah u shipai Khasi ba iap sha Siachen; T.20 lak pynbna jingiarap ka Sorkar

Syllad | The Rising MeghalayaNovember 10, 2024

Ia ka jingleh niam ba khatduh bad ka jingleit on tep donburom ia ka metiap kaba sah jong u Aibok Madur u riewshlur na ka Tnad shipai 10 Batallion jong ka Assam Regiment uba la aiti la ka jingim ha Siachen yn pyndep ha ka 11 tarik u Naiwieng 2024 ha ka shnong Lyngkhoi, East Khasi Hills.

Une u riewshlur u la aiti ia la ka jingim na ka bynta ka ri ha Siachen ha ka 7 tarik u Naiwieng bad hadien ia ka met la wanrah sha ka shnong ka jong u ha Mawbri, Ri Bhoi District ha kaba ka la don ka jingleh burom da ki bor shipai ha ka jingia don lang kiba haiing hasem.

Hynrei hadien la pynkit noh ia ka met jong u sha ka shnong Lyngkhoi, EKH kaba dei ka shnong i kurim jong u na ka bynta ka jingleh niam ba khatduh bad ka jingpyndep ia ka jingleit on tep donburom.

Ha kaba iadei bad kane ka jingjia na ka liang u Myntri Rangbah ka Jylla u Conrad K Sangma ha ka 10 tarik u Naiwieng u la pynpaw ka jingsngewlem bad pynbna ruh ba na ka liang ka Sorkar kan ai ia ka jingai jingiarap kaba T.20 lak sha kiba haiing hasem jong une u riewshlur.

“Ngi ai ka jingkhublei ia ka jingshlur jong u Sepoy Aibok Madur ka Assam Regiment, uba la aiti ia la ka jingim hapdeng jong ka kam ha ka 7 tarik u Naiwieng, 2024, ha Siachen. U Sepoy Madur uba na ka shnong Mawbri, ha Ri Bhoi District jong ka jylla Meghalaya, ula pyni ïa ka mynsiem ieid ri kaba shisha” ong u Myntri Rangbah.

U la ong ruh ba ia kane ka jinglen lade ka jong u yn ym lah ban klet junom. Ngi burom ia ka jingaiti ka jong u bad ngi kynmaw ia ka jingaiti lut ka jong u na ka bynta ka Ri.

“Ka jingsngewlem jong ngi ka leit sha ka iing ka sem jong u Sepoy Madur bad ngi ieng ha ka jingiatylli bad ki ha kaba kum kane kum kane ka khyllipmat jong ka jingsngewsih. Ka sorkar jylla ka ai ka jingkyrshan kaba pura bad ka jingsngewlem na ka bynta ka longiing kaba la duh noh ia u Sepoy Madur” ong u Conrad da kaba bynrap “Ai ba ka jingshlur bad ka jinglen lade jong une u riewshlur Aibok Madur kan ai mynsiem ia ki pateng ban wan bad ba ki matti jong u kan iai im junom ha ki dohnud ki jong ngi”.