1154 ki khynnah ba shah lehbeiñ iarap ka Childline ha ki 9 snem ha Rilum Jaintia

Syllad | The Rising MeghalayaJuly 7, 2020

Ka Childline Jowai kala rakhe ïaka lyngkhuh snem ba 9 snem ha rilum Jaintia haka sngi ba Ar ha Vincent Hall, Lumbih Syntu, Mihmyntdu, West Jaintia Hills District.

Ka Childline Jowai kaba pyniaid da ka Jaintia Hills Development Society (JHDS), ka seng treimon sngewbha kaba hap hapoh ka jingpeit ka Balang Katholik jong ka Jyllaniam Jowai ha kine ki 9 snem ka jingiaid lynti kala ioh ban iarap haduh 1154 ngut ki khynnah kiba shem jingeh ha kiba bun ki rukom.

“Kine ki khynnah kiba la iarap ka Childline Jowai ki kynthup ia kiba shah lehbeijot, kiba shah lehbein ha iing ha sem, kiba jah lynti bad kiba phet na iing,” la ong u Director ka JHDS u Phadar Manbha Pakem.

“Haka jingiakhun pyrshah iaka khlam COVID-19 ngi la lah ban iarap da ki bam ka ka dih sha ki 200 ngut ki khynnah kiba duk ba kyrduh,” ong shuh shuh u Phadar Manbha bad ula bynrap ba baroh kine ki khynnah kiba la poi sha ka Childline la ai iaki iaka jingsyllok ban saindur iaka jingim jong ki.

“Nga sngewsarong ruh ban iathuh ba mynshem snem kata ha u snem 2019 u Superintendent of Police barim ka West Jaintia Hills District u Bah Lakador Syiem MPS ula ai khusnam iaka Childline Jowai na ka bynta ka jingiarap iaki pulit ha ka ban tehlakam iaki kam sniew pyrshah iaki khynnah rit”, la ong u Phadar Manbha Pakem bad ula ai khublei kyrpang ia baroh ki nongtrei jong ka Childline Jowai kiba mynshwa bad kiba dang trei haduh mynta bad baroh kiba ia don bynta bad trei shitom na ka bynta ka bha ka miat ki khynnah ha kane ka District.

U Most Rev. Bishop Victor Lyngdoh uba donlang ha kane ka jingrakhe lyngkhuh snem ka Childline Jowai ula kitbok kitrwiang ia baroh ki nongtrei ka Childline ba kin nang nang treishitom shuh ban iarap iaki khynnah kiba shem jingeh bad ban saindur iaka lawei kaba phyrnai ka jong ki.

Ka Kong Mandakini Nongtdu Coordinator Childline, kala iathuh ba ka Childline ka don ka jaka treikam ha East bad West Jiantia. Ka Childline ka treikam baroh 24 kynta ban iarap iaki khynnah kiba hapoh 18 snem ka rta.

Ka kyntu ia baroh ba lada ki lap ki shem ia kino kino ki khynnah ba shem lanot ne shem jingeh ban pyntip sha ka Childline ha u number 1098.

Kiwei kiwei kiba donlang ha kane ka jingrakhe ki kynthup ia u George Wanroi Biam Officer Incharge Apex Bank, Jaintia Hills Region bad ki nngtrei ka Childline kiba la pynbyrngia da ki sur jingrwai bad jingshad. La ot ruh ia u cake ban sah kynmaw.