12 tylli ki shnong ha ka thain Khliehriat kim ioh umkor ha iing

Syllad | The Rising MeghalayaMarch 21, 2025

Ka Jaintia National Council Khliehriat Circle haka 19 tarik Lber kala iakynduh bad u Sub-Divisional Officer, PHE Electrical, Khliehriat Division ban wad jingtip halor ka jingslem ban pynpoi um kor sha ki shnong bapher bapher kiba don hapoh ka thaiñ Khliehriat.

Ha kane ka jingiakynduh la ialam da u president Khliehriat Circle u Shanborlang Bamon, u Symboh Sumer General Secretary nalor kiwei de ki dkhot ka seng.

Ha ka jingiakynduh u SDO ka PhE, Electrical Khliehriat Division u la iathuh ba kane ka jingpynpoi um sha ki shnong ba don hapoh ka thain Khliehriat kiba kynthup 12 tylli ki shnong kim hap hapoh ka Jal Jeevan Mission Scheme (JJM), hynrei ki hap hapoh ka State Plan Scheme.

Ula iathuh ruh ia kane ka project la sdang naduh u snem 2007, hynrei namar ba ka la sahteng ym lah shuh ban pyndep ia ka project ban pynpoi um sha ki 12 tylli ki shnong kumba la mang katkum ka por ba la buh bad la hap ban pynbeit biang ia kane ka project bad la sanction pat na ka bynta kane ka project ha u snem 2019-2020.

Ia kane ka project la sdang ia ka mynta bad ruh la lah ban pynpoi ia ki pipe um sha baroh ki 12 tylli ki shnong kiba kynthup naduh ka Deinsatlang, Umsatai, Rymbai, Deinchynrum, baroh ka Ladrymbai, Khliehriat East, Khliehriat West, Dkhiah East bad Dkhiah West bad ia ki top um (water tank) ruh la dep ban shna bad kaba dangsah mynta ka long sa tang ban test ia ki pipe um ban pyntikna ba kin nym bthei haba pyndon kam ia ki ban pynpoi um sha kitei ki 12 tylli ki shnong.

U la ong shuh shuh ba ia ka tyllong trai um ruh la dep ban test da ka Pollution Board bad da ka ophis ruh katkum ka jingbthah jong ka NGT bad la lap ba kane ka tyllong um ka long kaba bha bad kaba long ban dih.

Na ka liang jong ka JNC-KC ka la kyntu ia ka ophis u SDO ban pynkloi ia kane ka kam katba lah khamtam sha ka shnong Khliehriat kaba dei ruh ka Headquarter jong ka District.