1301 ki kam ba thylli pynkhreh ka sorkar ban thung noh ong u Conrad

Syllad | The Rising MeghalayaSeptember 13, 2022

Haba iadei bad ka jinglait jong ki 1,301 ki kam, u Myntri Rangbah ka jylla u Conrad K Sangma, u la ong ba ka kam hi ka dang sah bad ka Meghalaya Public Service Commission (MPSC), kane ka jingong ka jong u Conrad, ka la wan halor ka nongrim ban jubab ia ka jingkylli ba wanrah da u MLA ka Mawlai u bah Process T Sawkmie, uba la kwah ban tip ba aiu sha ha lyndet ka jingbym lah ban khot ia ka interview da ka MPSC, ha ka jingia shong dorbar synrai haka sngi ba ar.

Hadien kane, la iashim bynta lang ruh da u MLA ka Mawsynram u bah HM Shangpliang, uba la kwah ban tip ia ka rukom pynlong ia ki eksam kaba dei naka bynta ka kam Enforcement Inspector lem bad kiwei kiwei de ki kam kiba lait, kaba hangne ruh na ka liang u Myntri Rangbah u la ong ba ha kine ki ar snem kiba la dep, ka jylla ka la hap ban iaid ia ki raieh raidam namar ka jingwan ban lyngshop jong ka jinbgpang iabit Covid 19.

“Ha ki ar snem kiba la dep, ka la anrah jingeh bha ia ka MPSC ban pynlong ia ki eksam, dei na kane ka daw ba la buh jingeh bad ym lah ban thep briew ia ki kam kiba lait, ia kaba la bynrap pat sa da ka hukum ka iing bishar khamtam haba iadei bad ka roster system, ha kaba ki tnat treikam ki la donkam ban bud ryntih ia ka ha shwa ba kin wan shakhmat ban sdang ban iaid shakhmat ha ka jingthung kam thung jam” la ong u Conrad.

Ha kawei ka liang u Myntri Rangbah u pyntip hapoh ka iing ba ka sorkar jylla kja la don ia ka jingthmu ba kan khreh ban pynthymmai ia ka rukom treikam jong ka MPSC ha ka jylla, kaba ia mynta un nym pat lah ban batai, namar kane ka donkam ia ka jingiathir ia tai kaba janai shwa ban shim ia kano kano ka rai.