147 ngut ki samla kibala pyndep iaka jinghikai shet bam ha Amlarem Sub Division

Syllad | The Rising MeghalayaDecember 21, 2022

U Myntri ka tnad Pule Puthi bad tnad Kam Pohiing u Ma Lahkmen Rymbui ong ki samla ba kim dei kmen ymtang ba kila ïohkam hynrei ba kin long ruh ki nongpynïohkam ïa kiwei.

U Ma Lahkmen uba long u MLA ka Amlarem haba kren haka jingialang sam syrnod bad tiar ki tar ban sdang trei kiba la pyndep iaka jinghikai shet jingbam ba bun jait (food processing) ha Syiem Jingsuk School, Amlarem haka sngi ba Ar.

Ula banjur iaki samla kiba la dep shah hikai ba kin shimkhia ïa ka kam bad ban long kiba ñiewkor bad siewspah ïa ka por.

Also Read | Buh mawnongrim u Lahkmen Rymbui ban tei iaka Sub Divisional Hospital kaba nyngkong eh ha Rilum Jaintia

U Dr H.H.Mohrmen ula pynpaw ka jingsngewnguh ïa ka tnat Border Area Development ba lyngba u ma Rymbui uba long myntri ba dei khmih ïa kane ka tnat kila lah ban plie lad ïa ki samla jong kane ka thaiñ ba kin lah ban ïeng hala ki jong ki kjat bad seng kam lajong. Ha kane ka sngi nalor kaba sam ïa ki syrnod sha kiba la pyndep ïaka training, la sam ruh ïa ki tiar (startup kits) ba ki nongshah training kin pyndonkam ha kaban sdang ïa ka kam jong ki.

Kine ki samla ki dei kiba la pyndep ïa ka jingai jinghikai ha ka kam shet jingbam street food bad kumjuh ruh ha kaba shna jingbam na ki soh ki pai (food processing) ïa kaba la pynlong da ka Society for Urban bad Rural Empowerment (SURE), Jowai.

Also Read | 22 klur tam mang ban shna iaka surok Amlarem Pdengshakap Muktapur

Ka SURE kala pynlong ïa ka training ha ki saw tylli ki shnong kiba hap hapoh border kata Nongtalang, Amlarem, Darang bad Nongbareh. Haduh 147 ngut ki samla na ki than border bad ka Bangladesh kiba don hapoh ka Amlarem sub division kila ïoh jingmyntoi na kane ka training kaba la pynlong lyngba ka jingbei pisa na ka tnat Border Area Development jong ka Ophis u Deputy Commissioner West Jaintia Hills District, Jowai.

Ha kane ka jingialang la iadonlang ka Yvette Risa Mawlong SDO (Civil), Amlarem Sub Division, u ma Lambor Suchen District Skill Devlopment Officer, u Rev. Fr. G. Shangpliang uba long u phadar ba dei peit ïa kane ka skul.