15 snem shah rai set phatok u Elias Siangshai ba leh beijot ia ka samla

Syllad | The Rising MeghalayaOctober 25, 2024

Ka Kashari u Sessions Judge, Jowai, West Jaintia Hills District ka la rai pynrem ia u Elias Siangshai da kaba set phatok 15 snem kynthih namar ka jingdonkti ha kaba leh beijot ia kawei ka khynnah samla ha ka shnong kaba hap hapoh Nartiang PS, West Jaintia Hills District.

Ka Kashari ka la dain kuna ruh T.5000 namar ka jingdonkti ha kane ka kam bymman bad 5 snem ka rai set phatok nalor ka kuna kaba T.1000 namar ki kam byrngem byrsit.      

Ia kane ka rai pynrem ka Kashari ka la pynbna ha ka 16 tarik u Risaw, ha kaba baroh ki artylli ki rai pynrem kin iaid ryngkat ryngkat, kata ba un dang shah set sa na ka bynta 12 snem, 2 taiew bad saw sngi hadien ba u la dep shong lypa hapoh phatok.

Ka khubor pulit ka iathuh ba u Elias Siangshai u la leh ia kane ka kam bymman pyrshah ia kane ka samla ha ka shnong kaba hap hapoh Nartiang PS ha u Naiwieng 11, 2021, ha ka por 12:00 mynsngi bad hadien kane ka jingjia u la byrngem byrsit ia ka ba kam dei ban iathuh briew halor kane ka jingjia.

Hynrei, kane ka lanot ka la mudui da ka ejahar pyrshah ia u Elias Siangshai ha kaba ki pulit ka Nartiang Police Station ki la registar Case katkum ka No. 48(11)2021 hapoh jong ki kyndon Sections 376(2)(f) bad 506 IPC pyrshah ia une u runar.