15 sngi ai por ka JAC ban maramot ia ka surok NH-6 ha East Jaintia Hills ne mad ia ka jingiakhih

Syllad | The Rising MeghalayaFebruary 16, 2024

Ka Joint Action Committee (JAC) kaba kynthup ia ka Dorbar Shnong Ratacherra, Dona Umbluh, Dona Skul, Umkiang, Lumphyllut, Lumsoski, Pyrtakuna, Borsara, Kuliang, Shymplong bad Tongseng, Elaka Narpuh, East Jaintia Hills District ki la ai por 15 sngi ban maramot ia ka surok bah National Highway-6 ha East Jaintia Hills kaba la jot rathai khamtam naduh Lumshnong sha Malidor ne mad ia ka jingiakhih.

Ka JAC haka 15 tarik Rymphang hapoh ka jingialam jong ki Waheh Shnong ka la leit ruh ban aiti da ka jingthoh sha u Symbud Myntri Rangbah ka Jylla uba dei khmih ia ka Tnat PWD (R), u Bah Prestone Tynsong ban dawa ba dei ban phah maramot noh mardor ia kane ka surok kaba la jot rathai bad buh jingeh shibun ia ka leit ka wan.

Nalor kata ka JAC lyngba u Chairman u Bah Lasting Pala bad Secretary Bah Love You Bareh ka la pynpaw ruh ba ka jinglong jingman jong kane ka surok ka dei ruh kaba la saphriang bha lyngba ki lad pathai khubor bad kaba la poi ruh sha u pud ba ka iingbishar High Court ka jylla kan hap ban tuklar.

“Ngi sngew bynniaw jur halor ki sienjam jong ka National Highway Authority of India (NHAI) ha kaba iadei bad kane ka surok ba la tip kum ka National Highway bad baroh ka shilynter jong ka surok ka la wanrah ka jinglehrain ia ki jylla ba marjan bad kiba la pynpaw lem ruh ka jingsngewkhia halor kane ka jinglong jingman jong kane ka surok kaba la pynthut shibun ia ka leit ka wan jong ki kali bad ia ki riew paidbah bad kaba ju wanrah ruh ka jingdheng kali kaba neh da ki bun bun kynta” pynpaw ka JAC ha ka dorkhas kaba la ai sha u Bah Prestone

Shuh shuh ka JAC ka la pynpaw ba katba ym pat lah ban shim ia ki sienjam kiba dei biang, ki nongshong shnong kin dang iai bteng ban mad ia ka jingeh khamtam haba la wan sa ka aiom slap, kata da kaba khmih halor kane ka jinglong jingman kaba mynta jong kane ka surok kaba la pynlong ia ki paidbah ba kin pynpaw ka jingbitar pyrshah ia ka sorkar bad ka NHAI namar wat hadien ki jingpynthikna na ka NHAI hynrei haduh mynta ym pat lah ban shim ia ki sienjam ki ban lah ban weng ia kane ka jingeh.

Ka JAC ka la ong ruh ba ka sorkar ka dei ban shim ia ka jingkitkhlieh ban pynthikna ia ka NHAI ba kan phah maramot noh mardor ia kane ka surok lem kumta na ka liang ki paidbah nongshong shnong bad ki Dorbar ki la rai ban khangdam ia kane ka surok National Highway lada yn dang pynslem.

U Bah Prestone ula pyntip sha ki nongialam ka JAC ba iaka work orders la dep ai bad shen kan sdang noh ka jingmaramot iaka surok.