15 sngi ai por ka KSU ia ki bor District ban kyndang ia kiba sah beain ha Maxwelton Estate, Rilbong

Syllad | The Rising MeghalayaFebruary 15, 2024

Ka Khasi Students Union (KSU) haka 14 tarik Rymphang, ka la ai por 15 sngi ia sorkar jylla ba kan kyndang ia kiba shong ba sah beain napoh Maxwelton Estate, ka jaka kaba heh  9 akar ha Rilbong, Shillong lem kumta ka Seng kan shim hi da ki sienjam kiba tyngeh.

Ha ka dorkhas ba la phah sha u Deputy Commissioner ka East Khasi Hills, na ka liang u president ka KSU Laban Circle u Bah Reuben Najiar u la ong ba ki don shibun bah kiba shong ba sah beaiñ ha katei ka jaka khlem da ioh ia ka jingmynjur na ka Dorbar Shnong jong ka Kenches Trace Oxford Rilbong ne na kino kino ki bor sorkar ba dei khmih.

U la ong ruh ba kine ki briew kiba sah beain ki la sapriang ha kane ka jaka khlem da don ki nongpeit nongkhmih bad kaba lam sha ka jingwan rung kyrthep bad kaba buh jingman ia ka imlang sahlang bad ki shnong ki thaw namar mynta la bun bun snem ki la shna ia ki iing ki sem bad ki iingdara ki bym biang ia ki nala ha kaba ia baroh ki jaboh jabain la shu bret pathar sha ki nala, ki wah bad kaba ktah jur ia ka koit ka khiah jong ki nongshong shnong ba dei hok kiba shong marjan.

“Katto katne na kine ki nongshong beain ki dei kiba ri masi bad kiwei pat ki jingri hapoh kane ka jaka kaba hap hapoh Municipal   kaba pynkhein pyrshah ia ki kyndon jong ka Meghalaya Municipal Act, 1973, hynrei ia kane ka jingleh ka jong ki ym shym la don ba shimkhia bad leh ei ei,” ong u nongialam ka KSU.

Nalor kata u la ong ruh ba ki la don shibun ki jingujor lyngba Seng ha kaba iadei bad kane ka phang sha ka Shillong Municipal Board na ka bynta ban kyndang ia kine ki nongri jingri beain na kane ka jaka, hynrei kane ka jingeh ka dang iai bteng kumjuh.

Ka Seng ka la pynpaw ruh ba watla ka SMB ka la phah da ka jingthoh ha kaba iadei bad kane sha kitei ki briew kiba shong ba sah beain ha katei ka jaka bad sha kito ki nongri halor ka jingpyntuid ia ki jaboh jabain, hynrei kat haduh mynta kam pat shym la don kano kano ka jingleit kyndang ia kine ki nongri jingri bad ia kiba shong ba sah beain ha kane ka jaka.

Kumjuh ka Seng ka la kam ruh ba kane ka jaka mynta ka la kylla long ruh ka jaka jong ki jingleh kam sniew ba bun rukom ia kiba la kyrshan da kine ki briew kiba shong ba sah beain ha kane ka jaka.

Mynta la bun bun tylli ki snem la sakhi ia kiba bun bash ki kam bymman kiba mih na kane ka jaka, kata naduh ki kam khaii drok, ki kam nuti, ki kam lute bad kiwei pat ki kam pyntriem kiba buh jingsyier shibun na ka bynta ki kynthei khynnah bad ia ki nongshong shnong kiba don marjan kane ka jaka.