15 sngi ai por ka Sorkar ia ka HPC ban ai rai khatduh halor ka jingthmu pynkynriah na Them Metor

Syllad | The Rising MeghalayaAugust 10, 2024

Ka Sorkar Jylla ka la ai por 15 sngi ia ka Harijan Panchayat Committee (HPC) ba kan shim ia ka rai kaba khatduh halor ka jingthmu ban pynkynriah ia ki 342 tylli ki longiing napoh Them Metor, Iew Mawlong.

Ia kane ka rai la shim ha ka jingialang ba la pyniaid da u Symbud Myntri Rangbah ka Jylla uba long ruh u Chairman ka High Level Committee, u Bah Prestone Tynsong ha ka 10 tarik mynta u bnai ha ka jingiadon lang u para Symbud Myntri uba khmih ia ka kam pynroi sor u Bah Sniawbhalang Dhar, ka Deputy Commissioner ka East Khasi Hills ka Kong RM Kurbah, ki nongialam ka Harijan Panchayat Committee bad ki heh ophisar sorkar.

Haba kren sha ki lad pathai khubor, u Bah Sniawbhalang u la ong ba ka Sorkar ka la mynjur ban ai por 15 sngi ia ka HPC ba kan shim ia ka rai kaba khatduh bad ban aijingtip halor ka rai kaba ki la shim sha ka sorkar.

U la pyntip ba ka HPC ka la pan por 15 sngi namar ki kwah ban iamir jingmut halor ki katto katne ki mat bad baroh kiba don bynta shwa ba shim ia ka rai kaba khatduh.

“Kin sa aijingtip sha ka sorkar lada ka jingshim rai ka long kumno kumno ruh, hynrei ngi kyrmen skhem ba kan long kumba la angnud da baroh, kata ba kin mynjur noh halor kane ka jingtyrwa pynkynriah,” u la ong.

Nalor kata u Symbud Myntri Rangbah u la ong ruh ba kane ka kynhun ki nongmihkhmat ka HPC ki la pynpaw ia ka jingkmen ha kaba iadei bad ka ‘blue print’ ba la pynkhreh da ka sorkar.

Haba kylli u Bah Dhar u la ong, “Hadien jong kine ki 15 sngi kin ym don shuh kino kino ki jingialang. Ngin shim rai khatduh ia kine kiei kiei baroh hapoh ka 15 sngi.”

Ha kajuh ka por u la pynthikna ba na ka liang ka sorkar kan ym pynsngap ia kino kino ki kynhun kiba na shabar ka Jylla. 

Kham hashwa u General Secretary ka Delhi Sikh Gurdwara Management Committee, New Delhi u Jagdeep Singh Kahlon u la ong, “Ka la don ka jingiamir jingmut kaba jlan bha halor kane ka kam pynkynriah ia ki briew na Them Metor. Hynrei namar ba ki don ki katto katne ki bynta ki bym pat shai, kumta ngi la pan por 15 sngi bad hadien kasne ngin sa pyntip ia ka rai ka jong ngi bad shim ia ka rai kaba khatduh.