1500 Kilo tam ki tiar pynbthei kurup ki Pulit East Jaintia Hills, kem 6 ngut

Syllad | The Rising MeghalayaDecember 3, 2020

Haka jingthwet kaba jur iaki nongshalan beaiñ iaki tiar pynbthei, ki Pulit jong ka East Jaintia Hills District kila ioh kurup haduh 1525 KG ki tiar pynbthei bad kem haduh 6 ngut ki briew.

Ki Pulit kiba la pynlong ka jingthwet ia ki runar kiba shalan beaiñ iaki tiar pynbthei haka 2 tarik une u bnai haka por 7 baje mynmiet hadien bala ioh jingtip ba thikna ba don ka kali bolero kaba don u registration number Assam ka kit tiar pynbthei na Sookilo sha Kongong, East Jaintia Hills.

Mar mar ki pulit kila pyntip sha ki para pulit bad la pakhang lynti ia kane ka kali ha Kongong kaba hap ha Lad Rymbai OP. Haba ki pulit kila khynra ia kane ka kali la lap 10 synduk ki tiar pynbthei ba kynthup iaki bakhor dynamite (gelatin sticks) 2000 tylli bad 1000 tylli ki tikli (detonator) kiba khia haduh 250 Kilo.

Ka kynhun Pulit kaba kynthup ia u DSP (HQ), DSP (crime) bad kiwei kiwei ki pulit ophisar kila kem ia ki ar ngut kiba don haka kali bad da ka jingphla jong kine kiba shahkem, la iohkem sa saw ngut ki briew na Umpleng, Mokympad bad 5 Kilo kiba suba donkti ban shalan beaiñ ia kine ki tiar pynbthei sha kine arngut kiba shah kem haka bolero.

Kine kiba shah kem kila ialam ia ki pulit sha 5 Kilo kaba hap ha Khliehriat Police Station ka jaka ba buhrieh iaki tiar pynbthei kaba suba jur ba kane ka bolero ka kit ia kine ki mar na kane ka jaka.

Ki Pulit kila pynlong ka jingkhynra haka jingiadonlang ki nongsakhi ba laitluid bad kila ioh kurup sa 51 synduk ki tiar pynbthei kaba khia kumba 1275Kgs. Kine ki kynthup iaki bakhor dynamite (Gelatine Sticks)- 10200 , 5000 tylli ki tikli (Live Denators) bad 8 Roll ki Cordtex (Fuse) kiba suba jur kiba dei ki juh ki tiar ba pynbthei ha 4 Kilo dangshen.

Ki Pulit jong ka East Jaintia Hills kila register case bad pyngngat hapoh ka kyndon Explosives Act bad kiwei kiwei ki aiñ bad ka jingtohkit kala iaid shakhmat ban wad bniah la ka don jingiadei ne em bad ka jingpynbthei kaba la jia dangshen ha 4 kilo namar ba ki tiar kiba pyndonkam la suba jur ba ki dei ki juh.