2 tylli ki takma ksiar, 3 tylli ki takma rnong khur ka Meghalaya na ka 3rd North East Games

Syllad | The Rising MeghalayaMarch 19, 2024

Ka kynhun ki samla ialehkai ka jylla kiba don mynta hapoh Nagaland ban iashim bynta ha ki jingialehkai bapher bapher ka lympung 3rd North East Games ka long ba haduh ka por 6 baje janmiet mynta ka sngi, ka Meghalaya ka la lah ba kan ioh khur ar tylli ki takma ksiar bad ar tylli ki takma rnong na ka athletics, katba ha ka liang jong ka boxing u Sanjeev Maskut (48 Kg) bad bad Ram Lyngdoh (60Kg) ki  la lah ban jam sha ka semifinal,

Katba u Yuvraj D. Sangma u la khur ia ka takma rnong jong ka iakob ialehkai ka Tunggal kaba dei jong ka Pencak Silat, katba ha ka liang jong ka jingialehkai phutbol, ka khubor kaba pynjew mynsiem ka dei ka jingshah rem noh hakhmat ka Arunachal Pradesh da 2-1.

Haba phai sha ki takma kiba ki samla ialehkai ka jylla ki la ioh ba kin khur ha ka Athletics ka dei kaba la wan lyngba ka iakob mareh kaba 1500M ki shynrang hadien ba u samla Skhemlang Suba, katba na ka liang ki kynthei pat, ka Glorify Kurbah ka la ioh ba kan khur ia ka takma rnong na kane ka juh hi ka jingiakob mareh.

Hadien kane ka kynhun jong ki rang u ia mareh ka jylla ki la mih madan  biang ban iakhun ha ka iakob mareh jong ka 4x400M kaba hangne ruh sa shisien pat ka kynhun ka la ioh ba kan khur ia ka takma ksiar, katba na ka liang ki samla kynthei, ki la ioh pat ban khur ia ka takma rnong.

Ha kawei pat ka khubor kaba dei jong ka athletic, u Repol bad Henry ki la ioh ban jam sha ka phainal jong ka iakob mareh kaba 100m bad bynrap lang sa bad ka Kasanchi bad ka Riyoka ha ka liang ki kynthei.

Haba phai sha ka jingialehkai basketball, ki thei ialehkai ka jylla ki la lah ban pynliem noh ia ka Assam da 66/33 point.

Katba ha ka jingialehkai ia ka volleyball pat ka kynhun ialehkai ka jylla ki la shah liem noh ha ka Manipur.