20 snem shah rai set phatok u runar ba leh beijot ia ka khynnah

Syllad | The Rising MeghalayaDecember 9, 2023

Ka Kashari u Special Judge (POCSO), Shillong, u M Kumar ha ka 6 tarik mynta u bnai ka la rai pynrem da kaba set phatok 20 snem kynthih ha ryngkat ka kuna kaba long T. 10,000 pyrshah ia u runar uba donkti ha kaba leh beijot ia kawei ka khynnah kaba dang 15 snem rta.

Ha kaba iadei bad kane na ka liang u Superintendent of Police ka East Khasi Hills, Shillong u Bah S Nongtnger IPS u la ong ba ha ka 2.11.2021 la ioh pdiang ia ka jingujor FIR hapoh Mawlai PS halor ka jingshah leh beijot jong ka khynnah kaba dang 15 snem rta ha uwei u briew uba la shah kynnoh uba kyrteng u Dresstar Kurbah kaba la jia ha u bnai Jylliew 2021.

Hadien ia ka case la rejistar hapoh Mawlai PS Case No. 68 (11) 2021 U/S 5(j)(ii)/6 POCSO Act bad ia ka jingtohkit la shimti da WP/Sub Inspector Lavinia S Kongwang. Hadien ba la dep pynlong ia ka jingtohkit la chargesheet pyrshah ia une u briew katkum ka CS No. 1/2022 dt.12.01.2022.

Kumta hadien ba la pyndep ia ka jingtian bishar, na ka liang katei ka Kashari ka la pynbna ia katei ka rai pynrem pyrshah ia une u runar uba donkti ha katei ka kam bymman.