21,79,106 ngut ki nongthep vote ba dei, 1354 ki ‘duplicate’ haduh 8 tarik Risaw

Syllad | The Rising MeghalayaOctober 9, 2024

U Chief Electoral Officer (CEO) ka Jylla u BDR Tiwari ha ka 8 tarik u Risaw u la pyntip ba napdeng ki 22,41,984 ki nongthep vote haduh ka 8 tarik u Risaw la shem ba 21,79,106 ki dei kiba biang katkum ka jingkhmih bniah, katba 1354 ngut la ithuh kum ki ‘duplicate electors’ namar ka jingdon kyrteng ar jaka bad 23161 ngut kum kiba la khlad noh.

Ia kane u CEO u la pyntip ha ka jingialang bad ki seng sain pyrthei bad baroh ki District Election Officer (DEO) shibynta jong ka Special Summary Revision (SSR) 2025, ia kaba yn bteng ban pynlong khah khah tad haduh ban da pynmih ia ka Electoral Roll kaba khatduh.

Ia ki artylli ki copy ba pura jong ka Draft Electoral Roll bad ka Final Electoral Roll yn sa sam ei mardor sha ki seng sain pyrthei  kiba la ioh jingithuh ha ki jingialang paidbah.

U Tiwari u la ong ba katkum ka polisi ba la don lypa jong ka tnad Election Commission of India, ka Annual Summary Revision ka dei kaba la pynshong nongrim naduh ka 1 tarik u Kyllalyngkot jong u snem ban wan kum ka tarik pynrung kyrteng bad nangne yn bteng ka jingpynrung bad pynbeit ia ki kyrteng bad ia ka thup ba pura jong ki kyrteng la leh ha ka taiew ba nyngkong jong u bnai Kyllalyngkot jong ka snem kaba bud.

Katkum ki kyndon jong ka Section 14 jong ka Representation of People Act, 1950, 4 tylli ki tarik pynrung kyrteng (kata 1 tarik Kyllalyngkot, 1 tarik Iaiong, 1 tarik Naitung bad 1 tarik u Risaw) ki long kiba lait, bad kumta ia ka Annual Summary Revision la pynlong da kaba shim iaka 1 tarik u Kyllalyngkot jong u snem uba bud kum ka tarik pynrung kyrteng ha ryngkat ka jingkyrpad na ka bynta ka advance application na ka bynta ki laitylli ki tarik pynrung kyrteng, kata ka 1 tarik Iaiong, 1 tarik Naitung bad 1 tarik u Risaw jong u snem.

“Ka Commission ka la rai ban pyniaid shakhmat ia ka Annual Summary Revision da kaba shim ia ka 1 tarik u Kyllalyngkot 2025 kum ka tarik pynrung kyrteng ha baroh ki Jylla bad ki Union Territory, lait noh ia ka Haryana, Jharkhand, Maharashtra bad ka UT jong ka Jammu & Kashmir, ha kata ka rukom ba ia ka Electoral Roll la pynmih pura hashwa jong ka National Voters’ Day (January 25 man la u snem) khnang ba ia ki EPIC ba la pynmih thymmai na ka bynta ki nongthep vote bathymmai (18-19 snem) yn lah ban sam ha ki jingialang rakhe ia ka NVD,” u la ong.

Da kaba pynpaw ba ki don artylli ki bynta ban pynlong ia ka Revision Exercise jong ka Electoral Roll, kata kaba kynthup ia ka pre-revision bad ka revision, u DEO u la ong ba na ka bynta ka jingthmu ban ioh ia ka electoral roll kaba paka la khein kongsan bha halor ka jingleh ia ka pre-revision bad ia ka revision.

Ha kaba iadei bad ka special summary revision jong ka electoral roll 2025, u CEO u la ong ba hapoh ka pre-revision ia ka House to House (H2H) verification lyngba ki BLO, ka jingpynbeit biang ia ki jaka thep vote, ka jingweng ia ki jingduna ha ki electoral roll /EPIC (nuksa haba iap, kiba don kyrteng ar jaka, jingkynriah ki nongthep vote bad kiwei kiwei) bad ka jingpynbha halor ka jingshon ia ki dur bad kino kino ki jingdonkam la sdang naduh ka 20 tarik u Nailar bad kan kut ha ka 18 tarik u Risaw. Ka jingpynkhreh ia ka integrated draft roll da kaba shim ia ka 1 tarik u Kyllalyngkot 2025 kum ka tarik pynrung kyrteng yn pyndep ha ka 28 tarik u Risaw.

Shuh shuh ha kaba iadei bad ka jingpynbeit biang ne revision, une u heh ka Tnat election u la ong ba ka jingpynmih ia ka integrated draft electoral roll kan long ha ka 29 tarik u Risaw, ka jingphah ia ki jingkam bad jingpyrshah kan long naduh ka 29 tarik u Risaw haduh ka 28 tarik u Naiwieng, ka tarik na ka bynta ban pynlong ia ka special campaign kan long ha ka 15, 16, 21 bad 22 tarik u Naiwieng, ka jingpynkut ia ka jingkam bad jingpyrshah kan long hapoh ka 24 tarik u Nohprah bad ka jingpynmih ia ka Final Electoral Roll kan long ha ka 6 tarik u Kyllalyngkot 2025.