22-28 tarik Rymphang ka taiew ba kyrpang ka Science bad Technology ha Jylla, kan don ka jingiakop ba har rukom iaki khynnah skul

Syllad | The Rising MeghalayaFebruary 18, 2022

Ka State Council of Science Technology & Environment Meghalaya ryngkat ka jingiasnoh kti lang jong ka Vigyan Prasar ryngkat ka Shillong Science Centre, kin pynlong ia ka taiew ba kyrpang ba la tip kum ka Science & Technology, kaba long kum shi bynta ka jingrakhe ia ka lyngkhuh snem ba 75 ka jingioh laiutluid ka ri bad kumjuh kum shi bynta ka jingrakhe ia ka lyngkhuh snem ba 50 ka jingioh ia la ka jong ka jylla kaba pura.

Ia kane ka taiew  jingrakhe, la pynbna ia ka hynne ka sngi Thohdieng da u bah T W Kharbuli Project Co-ordinator and Curator  Shillong Science Centre  ha ka jingiadon lang u bah Calmbert Patrick Syiem, Programe Officer State Council of Science Techonology & Environment bad u bah Banjop Nongbri, Junior Mentor Shillong Science Centre.

Kane ka prokram kan sdang naduh ka 22 haduh ka 28 tarik mynta u bnai Rymphang, ha All Saints Hall, Shillong bad kumjuh hapoh ka sorbah Tura ban pynlong ha Tura Science Centre.

Ha kane ka taiew jong johng ka jingrakhe shibun tylli ki prokram labuh ban pynlong ha kane ka sngi ka sang shwa da ka jingplie pyrda ia kane ka jingialang, ban bynrap sa kawei pat ka prokram  ba tip kum ka ‘exhibition on wheels’ ban wanrah lyngba ka Indian Space Research Organisation, kaba dei hangne ba ki riew shemphang jong ka ISRO, kin pyni ia la ki jong ki tiar ki tar ba ki la shna bad pyndonkam ia ki.

Kiwei kiwei pat ki prokram ka kynthup ia ka jingai jingkren na ki stad science jong ka Indian Council of Medical Research, (ICMR), North Eastern Space Applications Centre (NESAC) ia kaba yn bynrap lang shuh shuh da ki jingikren na la ki jong ki riew shemphang ka jylla kum ki jong u Rtd Proff. W. Passah, Bah Aiban Swer, u Principal barim Shillong College Dr M. Dey.

Nalor ki jingkren, la rai ban pynlong ruh ia ka jingiakob kaba kyrpang naka bynta ki khynnah skul, ka poster exhibition. Ha man la kine ki sngi jong ka jingrakhe, kan da don kyrpang ruh ka phang pdeng, kum ka nuksa, ka sngi kaba ar jong ka phang pdeng jong kane ka prokram ka long halor ‘the annals of history of science, ban bud pat sa ka phang pdeng jong ‘milestone of science & technology, sngi kaba lai ‘inventions and innovations’ kaba dei ka sngi kaban kham kyrpang ha kaba la plie lad ia ki khynnah ba stad bad ba shemphang ban pynpaw ne ban pynshai ia kaei ka jinglap bad shem ka jong ki, bad ka sngi kaba saw kan dei ka ‘science literary festival.