22 tylli ki takma khur ka Meghalaya haka North East Games

Syllad | The Rising MeghalayaMarch 21, 2024

Ka Meghalaya ka la lah ba kan ioh ban khur shwa haduh 22 tylli ki takma tad haduh ba la kut jong ka sngi kaba ar jong ka lympung ialehkai 3rd North East Games kaba la iaid shaphrang mynta ha Nagaland.

Ka khubor na ki nongia synran lang ia kane ka kynhun ki pyntip ba ka kynhun ki rang bad ki thei ialehkai ka Meghalaya ki la ioh ba kin khur 2 tylli ki takma ksiar, 3 tylli ki takma Rupa bad 17 tylli ki takma rnong.

Ki takma kiba ka kynhun ialehkai ka jylla ki la ioh ba kin khur biang mynta ka sngi ka dei biang na ka Athletics hadien ba ki rang ia mareh ka jylla ki la ioh ba kin khur ia ka takma rnong na ka iakob mareh 4×100, kaba ha kane ka kynti kaba mynta la mih madan da u  Kyrshanlang Shylla, Repol Dkhar, Renaldi Dkhar bad Henry Yoga A Sanga, kiba la pyndep ia ka thong ha ka 44:22 seconds, katba ka Ritina Hanse ka la ioh ba kan khur ia ka takma rupa na ka iakob mareh kaba 400M ki kynthei hadien ba ka la lah ba kan pyndep ia ka thong ha ka 1:02.05.

Sa kawei pat ka jingialehkai kaba ki samla ialehkai ka jylla ki la kham paw bad ioh ban jkhur ki takma dei na Pincak Silat bad ki nongialehkai ba la ioh ban khur ia kine ki takma ki kynthup ia Usefulness Lyngdoh Nongum (f) 65-70Kg, Kyrshanlang Lyngdoh (m), 45-50 kg kiba la ioh ban khur ia ka takma rupa katba u  Pranjal Rabha (m) Kg 60-6, Sanju Rabha (m) Weight- 55-60, Moon Moon Rabha (m) Weight- 65-70, Indoarbiushbirth N Marak ( m) 40-45kg, Lakshmi Rabha( f) Weight- 55-60, Joplin Khar kylliang( f) Weight 60-65.

Katba ha ka liang jong ka jingialehkai ia ka Table Tennis kaba dei ka jingialehkai kynhun ne team event, ka kynhun ki rang bad ki thei ialehkai ka Meghalaya ki la lah ban ioh khur ia ka takma rnong.

Haba phai pat sha ka boxing, ka Riteeka ka la jam sha ka kyrdan iakhun jong ka semifinal ha ka kyrdan Riteeka  in 57kg.

Katba ha ka liang ka phutbol ki shynrang ka kynhun ialehkai ka jylla ka la lah ba kan wanphai sha ka lynti ka jingjop hadien ba ka la pynliem noh ia ka Tripura da 2-1.

Sa kawei pat ka jingialehkai kaba ki samla ka jylla ki la lah ban ioh khur ia ki takma ki jong ki dei na ka Wushu, ha kaba ki la lah ban ioh khur haduh 5 tylli ki takma kaba la wan lyngba ka  45 Kg Women -Juliana Blah, 48 Kg Women-Bashisha Nongrum, 56 Kg Men-Wanpher Kharkongor, 65 Kg Men-Francis R R Songthiang, 70 Kg Men-Mewanpynshngain Nongrum.

Haba phai sha ka iakob siat khnam ne archery, ka kynun ki rang ialehkai ka jylla ki la shah liem noh ha ki rang jong ka Assam ha ka kyurdan iakhun ka recurve bad kaba sah mynta ka long ka jingpynkhreh ban iakhun naka bynta ban ioh khur ia ka takma rnong pyrshah ia ka kynhun ialehkai jong ka Nagaland.

Katba ha ka liang ka jingialehkai ka badminton ha ka jingiakhun kaba para marwei ki shynrang u Gregoreo Passah u la shah liem noh ha u Jomie Singam ka Manipur da 14-21; 16-21, ka Netania T Tariang ka la shah liem noh ha ka Pinki Karki ka Arunachal Prradesh da 15-21, 10-21, ka Sheetal Joshi ka la shah liem noh noh ha ka to Princhee Das ka Assam da 21-17;21-5.

Haba phai pat sha ka basketball ki shynrang ka kynhun ialehkai ka jylla ki la shah liem noh hakhmat ka Mizoram da 39-88.