2,305 tylli ki case pang TB register ka Meghalaya ha shiteng jong u snem, pynbna jingialap thymmai

Syllad | The Rising MeghalayaJuly 14, 2024

Ka Meghalaya State Health Society ha ka 12 tarik myna u bnai ka la khot ia ka jingkyrshan lang jong ki nongshong shnong ha ka jingiakhun pyrshah ia ka jingpang Tuberculosis (TB) da kaba pynbna ia ki sienjam kiba thymmai ba la tip kum ka Corporate Social Responsibility (CSR) Engagement Initiative – For Dissemination of TB Message .

Lyngba kane ka sienjam ba la iatreilang ka NTEP bad ka Meghalaya Rural Bank (MRB), ka ka thmu ban pynphriang ia ki jingialap halor kane ka jingpang TB lyngba ka jingbuh ia ki shap kiba iadei bad ka jingpang TB ha ki passbook kiba dei jong kane ka bank.

U Ashish Yadav, Chairman ka MRB, u la pynbna ba ka Bank ka pynpaw ia ki jingialap halor ka jingpang TV ha ka ktien English, Khasi bad Garo ha ki passbook, kata da kaba pynleit jingmut khamtam ha ki thain nongkyndong jong ka Jylla Meghalaya. Kane ka dei ruh ka sienjam kaba pyniasoh bad ka prokram  kyrshan pisa bad ka thong jong ka Ri India ban rat dynkhong ia ka jingpang TB.

I Dr. M. Syiemlieh, State TB Officer, i la ai ka jingkren kaba bniah ha kaba iadei bad ka jingdon jong ki briew kiba pang TB ha kane ka Jylla ha kaba naduh u bnai Kyllalyngkot haduh u Jylliew 2024, ka Jylla ka la register haduh 2,305 tlli ki case kiba iadei bad ka jngpang TB haba ia nujor bad ki 4,971 ki case ha u snem baroh uwei ha u 2023. I Dr Syiemlieh i la ban jur halor ka jingdonkam ban shim ia kiba bun ki sienjam ha kaba iadei bad ki jingialap ban iakhun pyrshah ia kane ka jingpang.

Kane ka sienjam lyngba ki passbook ka long shibynta jong ki sienjam ban pyniadon bynta ia ki tnat bapher bapher bapher ha ka jingiakhun pyrshah ia ka jingpang TB, kata da kaba kynthup ruh ia ki dur bad ki jingtip halor ki dak ki shin jong ka jingpang TB, bad kine ki passbook kin kylla long ruh ki atiar ki ban aijinghikai bad kiba lah ban pyllait im ia ki mynsiem briew.

Nalor kata I la pynpaw ruh ha kaba iadei bad ka Pradhan Mantri TB Mukt Bharat Abhiyaan, kaba dei ka sienjam ba la shim da ka Sorkar India ka jingthmu ban pynduh jait ia ka jingpang TB. Ha Meghalaya naduh ba la sdang ia kane ka prokram ha u bnai Jylliew 2024, la lah ban sam haduh 6,666 ki song jingbam ba tei sha kumba 2,203 ngut ki nongpang TB. Hynrei watla katta ka dang donkam ia ka jingiarap bad jingkyrshan, ha kaba ki don haduh mynta kumba 1,300 ngut ki nongpang TB ki bym ioh satia ia ka jingkyrshan.

Ka MRB ka la pring haduh 10,000 tylli ki passbook kiba dei ia ki khubor kiba iadei bad ka jingpang TB ha baroh ki tnat jong ka ha Meghalaya. Ha kane ka jingialang la sam ruh ia ki passbook sha ki 10 ngut ki nongioh jingmyntoi, kata kaba kynthup sha laingut ki nongpang TB bad uwei pat u nongjop ha ka jingiakhun pyrshah ia ka jingpang TB uba la pynshlur bad aimyniem ia kiwei pat ki nongpang bad ia ki nongshong shnong.