24 ngut ki high risk contact na ka longkmie ba kha khun synrap ha Nongtalang CHC

Syllad | The Rising MeghalayaJuly 31, 2020

Haduh 24 ngut ki high risk contact kiba ka longkmie kaba khun synrap kala iakynduh ha Nongtalang CHC.

U Doktor ba dei khmih iaka Nongtalang CHC ula ong ba ki don haduh 24 ngut ki high risk contact bad kine ki kynthup iaki doktor, nurse bad ki nongpang ba thiah pang ha CHC Nongtalang.

Haba kylli la khang ne em iaka CHC, u Doktor ula ong ym shym la khang iaka aspatal, hynrei ki briew ruh kim nud shuh ban wan hadien bala bit khlam COVID-19 ka longkmie kaba khun synrap.

Kane ka longkmie kaba la test COVID-19 positive hadien bala kha khun synrap kala thiah shuwa ha Nongtalang CHC haka 23 tarik une u bnai bad haka 26 tarik la pynkynriah ïaka sha Jowai Civil Hospital Ialong ban kha ia i khun.

“iaka aspatal ngim shym la khang, hynrei ym don briew ne nongpang ba nud wan sha CHC, katba ka jingshakri iaki nongpang hapoh aspatal ka dang iaid shait shait. Ki nongpang ba don ha aspatal mynta ki kynthup kawei ka longkmie bad I khun bad 7 ngut kiwei pat ki nongpang,” ong u doktor uba la hap ban shong quarantine.

Namar ka jinghap shong quarantine ki doktor bad nurse kala ktah iaka jingai jingshakri kane ka aspatal.