241 kiba jah na ka jingshah sumar HIV ha East Jaiñtia Hills, sdang ka projek buddien

Syllad | The Rising MeghalayaJuly 21, 2022

Ban buddien ïa kito ki briew kiba im bad u khñiang jingpang HIV khnang ba kin bteng ia ka jingshah sumar Antiretroviral Therapy Treatment (ART) hapoh ka District East Jaintia Hills, haka sngi Balang la sdang ïaka project kaba tip kum ka Lost to Follow Up (LFU) Tracking/ Tracing Drive.

Ïa kane ka project la plie ha VC room ka ophis u Deputy Commissioner, East Jaintia Hills District, Khliehriat da u Deputy Commissioner Abhilash Baranwal, IAS.

Haka jingkren u Baranwal ula pyntip ba la don 241 ngut ki briew kiba im bad u khñiang jingpang HIV kiba khlem pyndep ïaka jingsumar ART.

Ula ong ruh ba ka thong jong ka project Lost to Follow Up (LFU) Tracking/ Tracing Drive kadei ban pynthikna ba baroh ki 241 ngut yn wanrah biang ïaki ban bteng ïaka jingsumar ART man ka sngi bad ban test ruh ïaki ba ha ïing hasem, ka lok u lok bad ki khun ki kti.

“Kane ka jingbuddien kalong ruh kum shibynta ban pynsngewthuh ïaki paidbah ba lyngba ka jingïarap ka ART u/ka briew kiba don ïa u khñiang jingpang HIV ki lah ban im ka jingim kumba juh long bad ban ïada ïaki na ka jingshah peit poh,” la ong u DC ka East Jaintia Hills District.

U Deputy Commissioner ula pyntip ba ka jinglut jingsep jong ka project ka long T. 3.5 Lakh haduh ka 4 Lakh bad kane ka pisa la ioh lyngba CSR (Corporate Social Responsibility). Ula bynrap ruh ba iaka jingsumar ART mynta la sumar ha Khliehriat Civil Hospital.

Ïa kane ka project yn pyntreikam da ka Meghalaya State Network of Positive People (MSNP+).

U Bah Barry L Kharmalki, Project Assistant, AHANA ula batai halor ka Lost to Follow Up (LFU) Tracking/ Tracing Drive (Finding the Missing Links Project) kadei ka projek kaba 3 bnai na bynta ban wad bad buddien ïaki 241 ngut ki briew kiba im bad u khñiang jingpang HIV (PLHIV) hapoh ka district kiba jah na ka jingshah sumar bad yn wanrah biang ïaki sha ka jaka sumar khnang ban lah iada ïaka jingsaphriang jong ka jingpang HIV hapoh district.

U Project Assistant, AHANA ula pyntip ruh kin don 3 ngut ki briew ne ki tracers kiba yn hikai da ka MSNP+ khnang ban ïada ïaka kyrteng jong kito kiba im bad u khñiang jingpang HIV.

Haba kren shuh shuh bad u nongthoh, ula ong ki briew kiba im bad u khñiang jingpang HIV bad kiba la sangeh ban shah sumar ki la kkynjoh 1048 ngut haduh u bnai Jylliew 2022. Nalor ki 241 ngut East Jaintia Hills District, ki don 293 ha West Jaintia Hills, East Khasi Hills 350 ngut, Ri Bhoi 66 ngut, South West Khasi Hills 14 ngut, West Khasi Hills 54 ngut, Garo Hills 10 ngut bad kiwei pat 20 ngut.

Ha kane program la iadonlang F Wann, MCS, EAC, East Jaintia Hills District, Khliehriat, Ajoy Lanong, Assistant Director for Mainstreaming Meghalaya AIDS Control Society, Agui Daimai, Co-Founder of Meghalaya State Network of Positive People (MSNP+) bad ka Iada Wriah, Assistant Director, Care Support and Treatment, Meghalaya Aids Control Society (MACS) nalor kiwei kiwei.

Lada don kino kino ki briew kiba khlem bteng shuh ban shah sumar bad kwah ban bteng ïaka jingsumar ki lah ban ïakren bad u Project Coordinator, u Bah Barry L Kharmalki ha une u number Phone +91 8732015954 (yn buhrieh ïaki kyrteng).