242 ngut ki khynnah skul ba ioh pdiang iaka 1st War Jaintia Scholarship Examination ka WJSU

Syllad | The Rising MeghalayaDecember 23, 2024

Haduh 242 ngut ki khynnah skul hapoh ka Amlarem Sub-Division, West Jaintia Hills District, kila ioh pdiang iaka scholarship hadien ba kila lehbha haka 1st War Jaintia Scholarship Examination 2024 ba la pynbeit da ka War Jaintia Students’ Union (WJSU) ryngkat ka jingiatreilang ka Amlari Model UP School.

Iaka khusnam pisa shaki khynnah skul la sam da u Adviser ka tnad pule puthi ka sorkar Jylla bad MLA barim ka Mawsynram Bah HM Shangpliang haka jingdonlang u MLA barim ka Amlarem Stephanson Mukhim, u Block Development Officer (BDO), Amlarem Bah GLC Mylliem, nalor kiwei kiwei haka jingialang kaba la long ha Enowell Hall, Amlarem haka 21 tarik Nohprah.

Iaka scholarship Examination la pynlong haka 14 tarik Nohprah haki 14 tylli ki eksam centre ha baroh kawei ka Amlarem Sub Division.

Ka jingpynlut na bynta kane ka scholarship ka long T. 3, 12, 500 (Lai lak khatar hajar sanspah tyngka). Ka rukom sam iaki khusnam ka long haki lai thup Top-10, Top-20 bad General.

Haka thup Top-10 kaba wan nyngkong kala ioh pdiang iaka song pisa kaba T.4000/, ba ar T.2500/. Ki khynnah kiba wan haka thup Top-20 kila ioh pdiang iaka song pisa kaba mar T. 1500/-, katba General mar T.1000/- ryngkat ka syrnod.

U Bah HM. Shangpliang haka jingkren, ula iaroh iaka WJSU kaba la khie im na ka jingsangeh treikam bad ioh mynsiem biang ban trei na ka bynta ka bha ka miat ka imlang sahlang bad u paidbah ka thain Amlarem Sub Division, bad bynrap ba ka long kaba donkam iaki sengbhalang kiba kum kine ban mih shakhmat ban kit iaka lyngkor jong ka jaitbynriew.

U Bah Shangpliang ula ban jur iaka jingdonkam kiba kum kine ki jait eksam khnang ba ki khynnah kin tip kaei ka pyrthei sawdong jong ki namar bunsien hi ki khynnah ki ju pule lyndet iaki lynnong kot bad ynda la kylli jingkylli shabar ka lynnong kim lah ban jubab.

Katkum ka jinglap jingshem ka jong u, ula ong ba ka jingeh ka long ba ynda ki khynnah kila pass iaka Class-10, ka don ka jingdawa na iing na sem ba kidei ban wad kam wad jam noh bad aplai iaki kam hapoh DSC bad ynda kila shong iaka eksam kim lah ban jubab wat tang iaki jingkylli jingtip kyllum (General Knowledge) bad kane kadei ka jingduhnong kaba khraw tam.

U General Secretary WJSU Everest Langstang ula iathuh ba ka jingthmu jong ka WJSU ban pynlong iaka Scholarship Examination ka long ban pynmlien iaki khynnah naduh dangrit ba kin myllen ia kiba kum kine ki jait Competitive Exam khnang ba ynda ki la heh kyrdan kin myllen bad jop haki jingpule jong ki, nalorkata ruh la khmih lynti ba lyngba ka jingpynlong ia kum kine ki Competitive Exam ka thain War Jaintia kan sa lah ban sei ia shibun ki ophisar kum ki IAS, IPS, MCS bad MPS haki sngi ki snem ban wan.

Ka WJSU kala aikhublei kyrpang iaka skulbah ICFA, MIT bad ki riew shimet kiba la kyrshan ia kane ka projek bad kyrpang ruh ia u MP Shillong Dr. Ricky AJ Syngkon ba lyngba ka jingiakren ka jong u, ka karkhana Star Cement kala kloi ban synniang pisa shi bynta sha ka seng.

Iaka jingialang la pynphuh pynphieng da ki jingrwai jingshad haka jingiadonlang ki Principal, ki nonghikai, ki kmie ki kpa, ki khynnah skul, ki riew rangbah ka thain bad kiwei kiwei.