27 ki bar jylla kila ioh EPIC, rai ki nongialam shnong ban pyrkhing iaka jingwan buhai shnong beaiñ ha War Jaintia

Syllad | The Rising MeghalayaAugust 12, 2020

Ka jingialang kaba la khot da ka SDO (C) Amlarem Sub Division hapdeng ki waheh shnong, daloi bad ki nongialam sengbhalang kala shim iaka rai ban bishar bniah Ia ki briew kiba wan buhai shnong beaiñ bad ban pyndam iaka kyrteng jong ki bar jylla kiba la ioh rung kyrteng haka thup jong ak Electoeal Roll na 7-Amlarem Assembly Constituency.

Kane ka jingialang kaba la kho ka SDO, Kong JU Kharpuri haka sngi ba Ar kadei halor ka jingujor ka KSU, War Jaintia halor ka jingioh rung kyrteng ki briew kiba wna buhai shnong beaiñ bad ki bar jylla haka Electoral Roll ban ioh ki jingmyntoi kum ki nongshong shnong ba paka jong ka ri.

Ha kane ka jingialang la ïadonlang ki Dalloi ba kynthup u Dalloi Elaka Jowai, Dalloi Elaka Amwi, Dalloi Elaka Satpator, Dalloi Elaka Nongtalang, Dalloi Elaka Darrang, ki Secretary Elaka bad Secretary Shnong bad ki waheh shnong jong ka War Jaintia bad ka Khasi Student Union (KSU).

“Naduh u snem 2015 bad haduh mynta mynne kam shym la shong kli kti bad ïai buddien ïa kane khnang ba ki bar Jylla kin ym ïoh ban buhai shnong beaiñ hapoh ka thaiñ War Jaiñtia bad hapoh ka bri u Hynñiewtrep da kaba pyrshang ban pynrung kyrteng ialade haka thup electoral roll. Ngi la ujor sha ka SDO bad dang shen ha u bnai Naitung 23 ruh ngi la ujor biang halor ka jingioh rung kyrteng ki 27 ngut ki bar jylla kiba ym dei ki trai shnong haka thup electoral roll,” ong u Lurman B. Talang general secretary ka KSU War Jaintia.

U President ka Synjuk ki Rangbah Shnong War Jaintia u Daniel Khongsit ula kyntu iaki Waheh Shnong ba kim bit ban ai syrnod ne kino kino ki kot ban pynshisha sha ki bar Jylla bad la ban jur ba kin bishar bniah bin pa bin iaki kot ki sla khang ban lait na ki jingeh hadien habud ban ban pynshisha iaka jinglong trai shnong ki briew kiba shu wan buhai shnong hapoh Amlarem.

“Dang bun ki trai shnong kiba ym don ki kot ki sla kumjuh ki EPIC. Ki trai ki dei ban pynbiang ia ki kot ki sla ba donkam khnang ba kin ioh ki jingmyntoi naka lad jingiarap jong ka sorkar.

Ngi kum ki nongialam shnong kila shim iaka rai ba nangne shakhmat ba ngim bit shuh ban ai syrnod ia uno uno u briew ne bar jylla,” la ong u Daniel uba long ruh u Waheh Shnong ka Bakur.

U President War Jaintia Circle u Laitphar Syngkrem la iaroh iaki Waheh Shnong bad ki Dalloi kiba la sngap iaka jingkyntu jong ka KSU ban weng iaki kyrteng ki bar Jylla na ka thup electoral roll bad kyntu ban pyrkhing ïaka jingrung ka mih jong ki bar Jylla hapoh shnong poh thaw bad kum ki nongialam ym kwah ban iohi ba ka War Jaintia kan long ka jaka bret ne dustbin jong ki bar Jylla.

Ka KSU ka ai khublei kyrpang ia ka Sub Divisional Officer (Civil) kaba la ialeh shitom ban khot sha ka miej jingiakren hapdeng ka KSU bad ki nongkitkam shnong khnang ban lait kino kino ki jingsngewiapher ne jingthut ha kaba iadei bad kane ka bynta.