3 lak kiew ka jingdon ki nongdih drok ha Meghalaya; mang ka Sorkar T.50 klur ban iakhun pyrshah: Paul

Syllad | The Rising MeghalayaAugust 27, 2024

Ka Jylla Meghalaya ka la sakhi ia ka jingkiew rasong ha ka jingdon jong ki nongdih drok, kata na ka 2 sha ka 3 lak ngut wat hadien ba ka Sorkar Jylla ka la mang haduh T.50 klur ban iakhun pyrshah ia ki kam khaii drok bad ban buh shuh shuh ia ki jaka iasyllok ne ki rehabilitation centre ha ka Jylla.

Haba pyntip ia kane ha ka jubab ka jong u hapoh ka iingdorbar Assembly haka 27 tarik Nailar, u Myntri ba khmih ia ka tnad Social Welfare u Bah Paul Lyngdoh u la ong, “Katkum ka jingwad bniah kaba thymmai ki don haduh kumba 3 lak ngut ki briew kiba la kyrni ha ki jingdih drok ha ka Jylla.”

“Naduh ba la sdang ia ka Drug Reduction, Elimination and Action Mission (DREAM), ka sorkar jylla ka la buh pisa haduh T. 50 klur ban iakhun pyrshah ia ka jingma na ki kam khaii drok,” u la ong.

U la pyntip ruh ba lyngba ka DREAM, ka sorkar jylla ka la iaid ruh na ka bynta ban thaw shuh shuh ia ki jaka sumar (deaddiction centre) ha baroh kawei ka jylla.

“Kumba ka long mynta lait noh tang ka East Khasi Hills district, la ithuh ia kiwei pat ki district ban buh ia kine ki jaka sumar,” u la bynrap.

Halor ka jingsngewkhia ba la pynpaw da ki liang pyrshah ha kaba iadei bad ka jingioh pisa kaba duna bha na ka Sorkar Pdeng ban iakhun pyrshah drok, u bah Paul u la ong, “Da lade hi shimet nga la lah ban iakren bad ka tnad ha Delhi bad ngan sa khot shen ia u Myntri ba dei khmih mar ia kut kane ka dorbar.”

Na ka liang u MLA ka VPP na Nongkrem u bah Ardent Basaiawmoit u la pynpaw ka jingsngewkhia kaba jur halor ka jingshyrkhei jong u drok ha kane ka jylla da kaba kyntu ia ka sorkar ba kan shim khia ban wad pisa shuh shuh na ka sorkar pdeng khnang ban lah ban weng ia kane ka jingeh.

Halor ka jingkwah tip jong u Bah Ardent ba ha kano ka nongrim ka sorkar ka kam ba ka jingjop ha ka jingiakhun pyrshah drok ka long kumba 20 percent, u bah Paul u la ong ba ka long halor ka jinglum bniah ia ki jingtip bad ki jingkheiñ jingdiah ba la ioh da ki bor sorkar bad ki kynhun shimet. “Kam dei ka jingkam kaba heh da ka sorkar namar kane ka long katkum ki jingioh lum ia ki jingkhein jingdiah, ka jingleh ia ki sorbe bad ki jingwad bniah,” u la bynrap.

Kham hashwa u Bah Paul Lyngdoh u la pyntip ba ki don haduh 10 tylli ki jaka rehabilitation centre ha ka jylla. Na kine, hynriew tylli ki centre la kyrshan da ka sorkar jylla lyngba ka tnad Social Welfare lyngba ka jingiatreilang jong ki kynhun shimet bad ki seng trei mon sngewbha kiba la shemphang halor kane ka bynta.

U la pyntip ruh ruh ba ki don 5 tylli ki Rehabilitation Centre ha East Khasi Hills District ha kaba 3 tylli ki dei kiba la ai jingïarap da ka sorkar pdeng bad kawei pat ka dei kaba la pynïaid da ka kynhun shimet.