3 tylli ki takma ksiar bad kawei ka rupa khur ka AMKA ha Delhi

Syllad | The Rising MeghalayaDecember 8, 2023

Lai ngut ki khynnah ialehkai ka All Meghalaya Kickboxing Association (AMKA) ki la lah ban wanrah nam bad ka buroim ia ka jylla Meghalaya hadien ba ki la ioh khur 3 tylli ki takma ksiar bad kawei ka takma rupa ha ka lympung iakhun jong ka National Kickboxing Championship. Ia kane ka lympung la pynlong ha New Delhi naduh ka 1 tarik haduh ka 30 tarik jong u bnai Nohprah, 2023.

Kine ki kynthup ia u Royalson Lapang ha ka K-1, u samla Plassing Mynsong ha ka Full Contact bad u Kordor Rynjah ruh haka full contact, katba u Shanbor Kurbah u la ioh khur ia ka takma rupa ha full contact.

U bah Samuel Hashah, u nongialam ka AMKA haba kren sha ki lad pathai khubor ha Shillong Press Club haka 8 atrik Nohprah, ula ong “Ka jingwanrah burom jong ki ia ka jylla kam dei shuh ka sien nyngkong, hynrei mynta u snem ruh kine ki juh hi ki khynnah ki la ioh khur takma ha Manipur ha ka Shanghai festival,”

U la bynrap, “Kane ka dei ruh ka sien nyngkong na ka bynta ka jylla Meghalaya ba ngi la leit ban shim bynta ha ka Ambedkar Sports for All and festival National Kickboxing Championship 2023 ha New Delhi.”

U Hashah u la pynpaw ruh ia ka jingkmen haduh katta katta bad u la ai khublei ia ki khynnah kiba la trei shitom miet la bad ki sngi, ki la lehkai bha, ki la kilanmet bha, kim shym la khein ialade bad lyngba ka jingtrei shitom jong ki, U Blei un nangkyrkhu ia ki ba kin nanglah ban wanrah burom shuh shuh ia ka jylla ha ki sngi ki snem kiban wan.

Ha kajuh ka por u la ai khublei kyrpang ia ki kmie ki kpa kiba la bei ia ki jinglut jingsep na ka bynta ki khun jong ki, lymda dei na ka jinglong la kloi jong ki, kine ki takma kin ym urlong.