30 sngi yn tohkit ka AEC ïaka kynnoh thungkam beaiñ ha JHADC

Syllad | The Rising MeghalayaJune 25, 2019

JOWAI: Ka Executive Committee jong ka Jaiñtia Hills Autonomous District Council (JHADC) kaba ialam u ma Thombor Shiwat kum u Chief Executive Member (CEM) kala thung da ka Administrative Enquiry Committee (AEC) kaban khlieh da u Judge jong ka Council J. Khyriam halor ka jingkynnoh thungkam beaiñ iaki 56 ngut hapoh ka konsil.

La buh por iaka EAC ban tohkit haduh 30 sngi bad kan ai ka report sha ka EC ba kan shongbishar bad ban ai ka rai kaba khatduh.

Ka Fight Against Corruption Team (FACT), Hynñiewtrep Youth Council (HYC-JHD) bad ka Hynniewtrep National Youth Front (HNYF-WJZ), kila pynpaw ba ka EC jong u ma Thombor kala shimkhia ban thung da ka AEC ban tohkit bniah halor ka rukom thungkam ia kitei ki 56 ngut.

Kine ki nongialam jong kine ki lai seng naduh ka FACT u Diamond Dhar, President HNYF Howniwot Sutong bad General Secretary ka HYC u Roming Star Lamare, ki la ong ba katkum ka jinglap jong ki haka budget jong ka council haka u snem 2018-2019, la lap ba don tang 7 tylli ki post ba dang thymmai kiba la sanction ha ka budget, kita ki long 2 tylli haka CWD bad san tylli pat hapoh ka Education Department.

Kila kam ba ka Council Service Rule 1981, Rule 9, ka kdew shai ruh ba ka EC ka lah ban thaw ia ki post kiba long permanent ne temporary kiba hapoh ka budget estimate jong ka council. Nalor kata katkum ka Rule 11 jong ka council Service rule 1981, ba ka jingthung kam kan long beit da ka jingpynbna paidbah ne advertisement kumjuh ruh ka jingialeh iaki examine bad ka personal interview, na ka bynta ban thung kam ia ki nongtrei Grade-IV, hynrei katkum ka jinglap jong ki lai seng katei ka EC barim ka la pynkhein ia kane ka aiñ jong ka Council.