300 ngut ki samla pule shah pynkup burom da ka 7 Amlarem LA Constituency Academic Award

Syllad | The Rising MeghalayaOctober 6, 2022

U Myntri ka tnad kam pohïing ka sorkar Jylla uba dei ruh u MLA ka Amlarem Constituency, u Ma Lahkmen Rymbui ula pynkup burom da ka 7 Amlarem LA Constituency Academic Award sha ki samla kiba pass bha ha ka eksamin bapher bapher ha une snem.

Ki don haduh 300 ngut kiba ioh pdiang ia kane ka khusnam bad nakaling u MLA ka thain ula ai khusnam ïaki da ka song pisa ryngkat ka syrnod. Kine ki samla kiba pass bha ki kynthup iaki SSLC, HSSLC bad ki degree bad ka award kaba kyrpad la ai sha ki 14 ngut kiba peit iaka jingkhuid jingsuba ka iew Amlarem.

Ia kane ka jingpynkup burom la pynlong ha phyllaw ka Enowel Hall haka jingdonlang u Chief Secretary ka sorkar Jylla u DP Wahlang, u Director General of Police u Dr. LR Bishnoi IPS, u Commissioner & Secretary ka tnad pule puthi u Dr. BDR Tiwari, ka SDO Amlarem Civil Sub Division ka Kong YR Mawlong bad kiwei nalor ki kmie ki kpa jong ki khynnah bad samla.

U Ma Lahkmen Rymbui haba kren ula ong, “Wat ong ba ka jingduk jingkyrduh kan long u maw jynthut ban pynwit ïaka pule puthi jong phi, hynrei ai ba ka jingthrang ïaka jingstad kan lam lynti ïa phi.” Ula kyntu ïaki khynnah ban bteng ïaka jingpule namar ka jingnang jingstad kadei ka atiar kaba khlain tam.

Shuh shuh ula kyntu iaki samla pule nalor ki kot ba ki pule ki dei ban wad jingtip lyngba ka kor internet ia ki mat kiba iadei bad ka pule ka puthi.