3272 ngut wan thep vote ha ki shnong khappud Meghalaya-Assam, 72.33 percent baroh ka Jylla

Syllad | The Rising MeghalayaApril 19, 2024

Ka Election Lok Sabha 2024 ha khappud Assam Meghalaya kala iaid beit iaid ryntih haka 19 tarik Iaiong.

Kane ka jingjied ka long na ka bynta ban jied iaki ar ngut ki MP sha ka 18th Lok Sabha, kaba ka result yn pynbna haka 4 tarik Jylliew.

Haduh 7 baje miet ka jingwan ki nongthep ha baroh ar seat ka long kala kynjoh iaka 72.33 percent ka jingthep vote ki paid nongshong shnong ka jylla, iathuh ka khubor na ka tnad election ka Jylla bad la khmih lynti ba kane ka rekod thep vote kan tam ia ka jong u snem 2019 kaba kot 71.42 percent.

Haba phai sha ki jaka khappud ruh ka jingthep vote ha khappud Assam Meghalaya, ruh kala iaid beit ka jingwan ka vote kala poi haduh 3272 na ka 5662 ka vote. Kine ki kynthup iaka Assembly Constituency ka Mowkaiaw bad ka Nartiang.

Ha ka Shnong Mukroh kaba hap hapoh 4-Mowkaiaw Assembly Konstituensi ka don kawei ka polling station na bynta ki kynthei bad kawei ka polling station na bynta ki shynrang bad kine ki polling station ki dei tang na bynta ki nongshong shnong jong ka Shnong Mukroh.

Tang 431 ngut ki shynrang na ka 821 ngut ki la wan thep vote katba na ki 810 ngut ki kynthei ki nongwan thep vote ki long tang 476 ngut.

Katba ha Shnong Khanduli kaba hap hapoh 1-Nartiang Assembly Konstitwensi ki don ar tylli ki polling station mar kawei na bynta ki kynthei bad shynrang bad ha ki polling station ba don ha Khanduli, ki nongwan thep vote ki long na Khanduli, Myn-i, Umshangiar bad Umplu.

Na ka 1004 votes jong ki shynrang, ki nongthep vote ki long haduh 707 ngut katba na ka 975 vote jong ki kynthei, ki nongthep vote ki la long 751 ngut.

Sa artylli pat ki polling station ki long ha Shnong Tum Tum hapoh kaba hap ha 4-Mowkaiaw Assembly Konstitwensi bad ki dei na bynta ki nongthep vote na Tum Tum, Myntang tihwieh, Pdienlapatein, Psiar, Khatkasla, Mowluber.

467 ngut ki shynrang ki la wan thep vote na ka jingdon vote kaba 996 vote pura bad 431 ngut ki kynthei ki la wan thep vote na ka 1056 ngut.