37 tylli ki constituency ka Congress ka lah ban jop, ym pat lah rai iaka Jowai: VH Pala

Syllad | The Rising MeghalayaJanuary 6, 2023

U president ka Meghalaya Pradesh Congress Committee (MPCC) bad u MP ka Shillong seat u ma Vincent H Pala ula ong haduh 37 tylli ki seat ka Congress ka lah ban jop ha kane ka MLA elekshon ban wan sha ka iing dorbar thawain ka Jylla.

U ma Vincent uba long ruh u kandidate ka Sutnga Saipung haba kren haka jingialang pynrung dkhot ka Block Congress Committee ka Sungta Saipung haka sngi Thohdieng, ula ong ba ha kine ki 37 constituency ka jingiakhun ka long kaba iathain bad kiwei ki party bad ka Congress kalah ban poi sha ka jingjop.

U Ma Vincent ula ong “Lada khein baroh ki constituency tang ha Khasi Jaintia ki don 23-24 tylli ki Constituency kiba ka Congress ka lah ban jop. Na garo Hills na ka 24 tylli ki Constituency, kane ka sien kaba nyngkong ba ki Garo Hills phin iohi ba ki nonghikai na ki kolej bad ki samla kiba pass na IIM, IIT kila ieh iaka kam jong ki ban iakhun iaka election bad na ka 24 Constituency 14 tylli ki seat ka jingiakhun ka long ba Congress ka iaknieh namjop.”

Ha kaba iadei bad ka jingpynieng kyrtong na baroh 60 constituency, 55 tylli ki constituency la rai ban pynieng kandidate, ki don katto katne ki jaka ka jur bha ka jingiaknieh ticket bad shen yn pynbna noh iaka ticket, la ong u ma Pala.

Katba 5 tylli kiwei pat ki constituency namar ba trei jubor ka pisa ka Congress ka lah ban ym pynmih kyrtong ha kum kine ki Constituency namar lada pynīeng ruh ki candidate kin nym poi sha ka thong. Ar tylli ki constituency kiba la thikna ban nym pynieng kyrtong ka Congress ka kynthup iaka Khliehriat bad Amlarem.

Ula ong ruh ba ka Jowai Constituency hadien ba ka u Andrew Shullai ula phet seng haka khyllipmat kaba khatduh, ia kane ka constituency ruh ym pat lah ban rai bad ka party ka dang hap ban pynbeit ia kane ka constituency kaba bun ki nongkyrshan kila sakma.