4 ngut thep kyrteng iaka shuki CEM bad Chairman ka JHADC

Syllad | The Rising MeghalayaFebruary 27, 2025

U Ma Thombor Shiwat bad u ma Madonbai Rymbai ki dei ki ar ngut kiba la thep kyrteng na ka bynta ka shuki Chief Executive Member JHADC, katba u Rikut N Parien bad u Dr Sankey Shangpung kila thep kyrteng na ka bynta ban iakhun iaka shuki Chairman ka konsil.

Kine ki saw ngut kila thep kyrteng hadien bala pyndep iaka jingbam smai kum ki MDC ba thymmai ka konsil haka 27 tarik Rymphang.

Iaka jingthep kyrteng la pyndep hakhmat u Joint Secretary ka tnat Legislative jong ka konsil bad ka jingjied iaka shuki Chiarman bad CEM kan long lashai ka sngi haka por 11.00 baje mynstep.

Iaka kyrteng jong u Dr. Sankey Shanpung la tyrwa da u Ma Medling Swer MDC UDP bad u Ma Het Pohthmi MDC, Ma Jesse Suiam bad Reforming Lamare na ka NPP.

Katba iaka kyrteng jong u Ma Rikut N. Parien la tyrwa da u Ma Madonbai Rymbai bad Lalwilliama Theite naka Congress.

Iaka kyrteng jong u Thombor Shiwat la tyrwa da u Hambertus Nongtdu, Pheinchwa Nanglein bad Seibor Shadap naka NPP. Katba iaka kyrteng jong u Ma Madonbai Rymbai la tyrwa da u Ma Rikut N. Parien bad Lalwilliama Theite.