40 ngut ki samla jied ka CIT Amlarem haka Tour Guide Skill Training

Syllad | The Rising MeghalayaNovember 2, 2022

40 ngut ki khynnah samla ki lah shah jied ban shah hikai ha ka Tour Guide Skill Training ba la pynlong da ka Community Institute of Technology (CIT), Amlarem hapoh ka Amlarem Block ryngkat ka jingiatreilang ka office jong U Deputy Commissioner, West Jaintia Hills lyngba ka PMKKKY Scheme.

Ia kane ka programme la sdang haka sngi Balang ha Sualudong, Thangbuli. U Block Development Officer, Amlarem C&RD Block, Dr. D. Lyngdoh ula plie ia kane ka jingai jinghikai ha ka jingdon lang u ma Lambormi Suchen, Skill Development Officer (SDO), Meghalaya State Skill Development Society bad ia ka programme ha kane ka sngi la pyniaid da u ma L.Lanong, Director, CIT.

u dr Lyngdoh haba kren ha kane ka sngi u la kyntu ia ki wan shah hikai pyntbit ban long ki tour guide ne ki nongialam iaki nongwan kai suwari ha ki jaka bapher bapher ba kin shim khia ia kane ka training namar ka dei kawei na ki training ka ban iarap ia ki na ka bynta ban trei bad ban kamai ha ka kam Tourist Guide.

“Ka thain War Jaintia ka don kyrhai ki jingai ka mariang bad ki jaka ba itynnad kila khring ia kiba bun ban wan shangkai, kumta kano kano ka jinghikai kaba phi ioh pyndonkam hok iaka ban ka long ka lad kamai jakpoh,” la ong u BDO iaki nongwan shah hikai.

U Skill Development Officer, Lambormi Suchen, u la iathuh ba kane kadei ka programme kaba ka Sorkar lyngba ka office U Deputy Commissioner, West Jaintia Hills ka la iarap kyrpang na ka bynta kumno ban thawlad ia ki samla sha ki nongkyndong ban phai khmat bad shim khia ha ka liang ka tourism namar kane ka dei ka karkhana ai kam ka biang eh hapoh kane ka district.

Ha kane ka training Tour Guide, 40 ngut ki khynnah samla shynrang bad kynthei kin ioh ia ka training kaba 12 sngi, bad ha kane ka training kin ioh ban shah hikai ha ka Rapelling, Zumaring, knot practice, Rope stretcher, Basic First Aid, Trekking (Practical and Theory) Guide, bad kiwei kiwei.