48 kynta ai por ka Khliehriat Block Congress Committee iaka MPCC ban weng iaka kyrtong

Syllad | The Rising MeghalayaJanuary 31, 2023

Ka Khliehriat Block Congress Committee, Khliehriat Assembly Youth Congress Committee bad ka Mahila Congress kila ai por 48 kynta iaka MPCC ban weng iaka kyrteng jong ka kyrtong kaba la pynbna napoh 6 Khliehriat Constituency.

U Secretary Khliehriat Block Congress Committee Rimistar Dkhar ula ong ba ka Khliehriat Block Congress Committee, Youth Congress Committee bad Mahila Congress Committee kim hun bad pdiang satia iaka kyrtong kaba la pynbna ka AICC bad ka MPCC kaba la pynbna haka 25 tarik u bnai Kyllalyngkot.

Kane ka kyrtong ka dei kaba la tip kum ka Jhanika Siangshai bad kaba lyngngoh kumno ka MPCC ka ai jingmynjur ban jied iaka kum ka kyrtong ne candidate haba kala dep ban phet na ka seng Congress naduh u August (Nailar) 2022 bad iasoh sha ka NPP (National Peoples’ party ha 11 tarik u September (Nailur) 2022, la ong u Rimistar. Ka khliehriat Block Congress Committee kala dap da ka jingsngewsih bad sngewdiaw ka mynsein hadein ba iohi ia ka kyrteng jong ka kyrtong ka party napoh 6-Khliehriat Assembly Constituency. Kane ka jingleh ka MPCC ka khlem pyntip bad iasyllok shwa ruh bad ki Nongialam jong ka block bad district level. Kane ka pyni ka jingbymsuhniew bad bym burom shuh ia ki Nongialam ka Block bad district level daka MPCC.

Ula ong shuh shuh ba hadein bala iohi iaka khubor, ka Khliehriat Block Congress Committee (KBCC) lem bad ka Khliehriat Assembly Youth Congress Committee (KAYCC) bad ki Mahila Congress Committee, ki circle bad ki Unit jong ka party kila ialum kyrkieh iaka jingialang haka Khliehriat West. “Da kawei ka jingmut ngi la rai ban ym pdiang da leilei ia kane ka kyrtong jong ka party. Ngi la rai ban ai por ruh 48 kynta iaka MPCC ban weng iaka kyrteng jong ka kum ka kyrtong bad lada ka MPCC kam sngap iaka rai jong ka block kim banse ban shim da kawei ka rai kaba tyngeh,” la ong u Rimistar.

U president Khliehriat Assembly Youth Congress Committee u Chrispin N Dkhar ula buh jingkylli kumno ka MPCC ka buh kyrtong da ka briew kaba beiñ bad kren poh ia ka party bad iaki nongialam jong party naduh state haduh block level.

Ula ong ba marsien iohi iaka khubor ba paw kyrteng kane ka kyrtong ba phet seng, ngi baroh ki nongialam bad ki nongbat kam hapoh Khliehriat ki sah haka umdum bad dawa na ka MPCC ban shim iaka jingkitkhlieh bad pynbeit mardor ia kane ka kam.