48 kynta lip bording man ka por ha ki 9 tylli ki shnong ha East Jaintia Hills

Syllad | The Rising MeghalayaJune 18, 2021

Khlieh la ka sngi ka Meghalaya Energy Corporation Limited (MeECL) kala pynlip bording haduh 48 kynta ia ki 9 tylli ki shnong ha East Jaintia Hills District bad kine ki shnong kila pan jingshai naka MeECL hapoh 14 sngi namar ba ki siew thikna iaka bai thang bording.

Kine ki khyndai shnong ki kynthup iaka Umkiang, Kuliang, Pyrtakuna, Lumsoskie, Lumphyllut, Dona Bhoi, Dona Skul, Dona Umbluh bad ka Ratacherra.

Kine ki khyndai tylli ki shnong kila pan jingshai na Executive Engineer (Distribution), MeECL, Moowakhu, Khliehriat ba un pynshai hapoh 14 sngi ba kaei ka daw ba ki lip bording man ka sngi, kaba la wanrah jingeh iaki namar ba shit ka suinbneng sha kane ka thain kaba don ha khappud Assam bad Bangladesh.

Kum ki paidbah kila pynpaw ba ki siew thikna iaka bai bording sha ka MeECl, hynrei kam shym la lah satia ban ai ka jingshakri bad bording kaba khlem thud. Kane ka jingthud ne ka jinglip bording ha kine ki shnong kala pynlyngngoh la ka MeECL ka pyntreikam iaka shutdown ha kine ki shnong.

“Ngim sngewthuh ha kano ka dur ba la pynlip iaka bording ha kine ki shnong jong ngi, khamtam haba slap bad jur ka lyer. Kane ka rukom leh ka MeECL kam dei kaba mynnin mynta. La I kumba ki nongtrei kiba trei ha ki sub station ki ap ia u slap bad ka lyer namar ba marsien slap kin pynduh iaka bording,” la ong ka shithi kaba la phah u ma Kynjaimon Amse, Assistant Waheh Shnong Umkiang sha u Executive Engineer MeECL, Moowakhu bad bynrap la kumba ka bording kaba sam sha kine ki shnong ki tieng ia u slap ka lyer lane baka bording kaba ka MeECL ka ai kam dei ka juh kaba ai sha Jowai, Shillong ne Khliehriat.

Ula kynthoh ruh hato ka bording kaba dei ban ai sha kine ki shnong la dep die lut mo sha ki kharkhana cement ha Narpuh Elaka.

Ha kum kane ka por ka saw ka sian naka jingwan lyngshop ka khlam COVID-19, ka sorkar ka bthah ia ki paidbah ban shong ha iing, hynrei khlem ka bording ha kine ki jaka ba shit kumno ki paidbah kin neh ban shong ha ïing. Ka sorkar ka dei ban sngewthuh iaki jingeh jong ki paidbah bad ka dei ban pynbeit mardor ia kane ka rukom pynlip bording sha kine ki shnong khappud bad ki shnong kiba ka jingshit kala kiew katba nang mih ki snem.