5 tylli ki mat rah ki Ladrymbai Police hakhmat ki waheh shnong ban khanglad ïaki kam sniew

Syllad | The Rising MeghalayaApril 10, 2021

Ban tem ïaki kam sniew kiba la jyllei katba nang mih ka sngi, ki Pulit jong ka Ladrymbai Out Post, East Jaiñtia Hills kala lum jingïalang ïaki waheh shnong kiba don hapoh u pud u sam jong ka Ladrymbai OP haka sngi Saitjaiñ

Ha kane ka jingïalang la ïakren halor ki 5 tylli ki mat kaba kynthup ïaka Law and Order ne ka shongsuk saiñ, ka jingeh ha ki khappud India Bangladesh, ka jingma kaba ap na ka kam khaïi bad dih drok kaba la suhthied ha ki shnong kyndong tam ha East Jaintia Hills District, ka jingshongkha khynnah bad ka jingai wai ïing khlem da pynthikna iaki kot ki sla jong u nongshong wai.

Ha kaba iadei bad ka jingai wai ïing la kyntu ia baroh ban pynthikna shuwa iaka jaka sah jaka shong ki briew bad ryngkat ki kot ki sla ban pynshisha, khnang ba khanglad ia ki riew sniew ban rieh tngen ha katei ka thain.

Kiwei ki jingeh kiba la ïakren ka dei halor kumno ban iakhun pyrshah bad iada na ki kam sniew, ka khlam Covid-19, ka jingdheng kali ha Ladrymbai bad kiwei kiwei.

Ïa kane ka jingïalang la pyniaid da u officer incharge ka Ladrymbai OP u SI W Nongtdu bad u incharge ka traffic SI ASR Lakiang. La iadonlang baroh ki waheh shnong kiba hap hapoh u pud u sam ha Ladrymbai OP.

Ha kane ka jingialang la iakren sani bha ia kitei ki 5 tylli ki mat ban tem iaki jingsniew bad ki Pulit ka Ladrymbai OP kila khot ka jingiatreilang ki waheh shnong ban tem iaki kam sniew. Na kaliang ki Waheh shnong kila pynpaw iaka jingsngewnguh ia ka Ladrymbai OP kaba la khot ia kane ka jingialang bad don ka jingiajan hapdeng ki Pulit bad ki nongialam shnong.

Ha kaba iadei bad ka jingdheng kali, ki Pulit ka Ladrymbai kila iathuh ba ki duna briew bad don mynta ki don tang uwei u major bad ar ngut ki nongiarap kaba la buh jingeh bha iaki pulti ban pyniaid iaki kali. Ha kane ka jingïalang la rai ba ki VDP Shnong ka Ladrymbai Pyllun kin iarap ban iatreilang bad ka bor pulit traffic khnang ban lah ban tehlakam ia Ka jingdheng kali bad ban pynshitom ia kino kino ki briew kiba pynkheiñ iaki aiñ niah kali.