50 klur donkam ban pyniaid iaka jingialehkai ha Jylla: Meghalaya State Olympic Association

Syllad | The Rising MeghalayaFebruary 16, 2022

Ka Meghalaya State Olympic Association (MSOA) ka la lum jingïalang ïaki synjuk ïalehkai kiba la ithuh iaki jait ialehkai haka Olympic haka sngi ba Ar ban iakren sani halor ka jingkyrshan pisa ka sorkar.

Hane ka jingïalang la ïakren halor ki mat kiba bun ki ban khreh ban leit ban rah bad ban sa pynsngew sha ka sorkar Jylla ïaka jingdonkam jong ka lad kyrshan pisa kaba ka sorkar ka donkam ba kan ai sha ki synjuk ïalehkai kiba don ha ka Jylla.

U working president ka Meghalaya State Olympic Association, u bah John F Kharshiing bad u General Secretary u bah Finely L Pariat haba kren sha ki lad pathai khubor ki la ïathuh, katkum ka jingkheiñ khyllum la antad ba haka shisnem ka sorkar Jylla ka donkam ban ai ïaka song iarap pisa kaba ym duna ïaka 50 klur tyngka.

“Tang ka Meghalaya Football Association ka donkam ïaka mang pisa kaba ym duna ïaka 2 klur tyngka, ka Archery tang ki tiar ban ïalehkai ki la kot sha ka 1 klur tyngka katba ka Shooting ki tiar siat jan poi sha ka 2 klur tam tyngka”, la ong u bah Kharshiïing.

Ula bynrap da kaba ba kane ka jingïalang ka long tang ka jingsdang hynrei haka jingshisha, ïa kum kane ka jingpynkhreh mang pisa, ka la don teng ka Team Preparation Committee, kaba lam khmat da ka ophis jong ka Directorate of Sports & Youth Affairs, ha kaba ki synjuk ïalehkai ki la wanrah ïa la ka kaiphod jingdonkam pisa ka jong ki.

Shuh shuh ula ong, haba kheiñ kyllum ka pisa baroh na ka bynta ka jingpynkhreh ka kynjoh sha ka 65 klur tyngka, katta naduh u snem 2018-2022.