50 ngut ki samla kin ioh jinghikai pyntbit ban shna website ha Jowai

Syllad | The Rising MeghalayaApril 4, 2023

Ka Jaintia Institute & Technology, Jowai lyngba ka jingkyrshan ka Meghalaya State Skills Development Society (MSSDS) jong ka tnad Labour kan hikai pyntbit haduh 50 ngut ki samla shynrang bad kynthei ban shna website ne Web Developer.

Ïa kane ka jingai jinghikai la plie paidbah haka sngi ba ar da u MLA ka Jowai u Wailadmiki Shylla haka jingdonlang u Managing Director Jaintia Institute & Technology u Bankitbor Marweiñ haka jingïalang kaba la long ha Auditorium ka Kiang Nangbah Govt. College.

U Skill Development Officer, u Lambormi Suchen haba kren haka jingialang ula ïathuh ïaki jingmyntoi ba ïoh naka Skill Meghalaya Project jong ka sorkar. Ula ong ruh ba kane ka jingai jinghikai ka dei na ka bynta lai bnai bad yn pynlong ha shlem jong ka Jaintia Institute & Technology.

Ula iathuh ba ka skill Meghalaya da ka jingïatreilang bad ki seng treimon sngewbha ki ai ïaki training bapher bapher na bynta ki khun samla kiba don ka jingthmu ban seng kam lajong bad ki ïoh trei haki jaka bapher bapher ynda ki la dep ban pyntbit ïalade lyngba kane ka Skill Training.

U Wailadmiki Shylla haba kren kum u kongsan ula kyntu ïaki samla ban trei minot bad trei shitom ha ki jait kam ba ki sngewtynnad bad ula ban jur ruh ïaki samka ba kin long kiba ïaishah ha kano kano ka kam ba ki trei namar ka jingïaishah ka wanrah ïa u soh jong ka jingjop.

Kiwei kiwei kiba kren ki kynthup iaka Principal ka Kiang Nangbah Govt’s College ka Dr. EM Blah bad uwei u samla uba pyndep ïaka jinghikai na ka skill Meghalaya u Jefferson Lyngdoh uba la ai mynsiem ïaki samla kiba don hapoh ka training ba kin trei shitom bad minot khnang ba kin ïoh ban kheit ïa u soh jong ka jingjop.