50 snem ka jingiaid lynti ka JSU, wanrah iaka Blood Bank & MBoSE Cell ha Jowai

Syllad | The Rising MeghalayaMay 1, 2022

U Nujorki Sungoh MLA jong ka Mowkaiaw uba long ruh organising secretary barim ka Jaintia Students’ Union (JSU) ula ong ba haka jingiaid lynti jong ka JSU ha ki 50 snem da ka jingpynbor iaka sorkar la lah ban wanrah iaka Blood Bank bad ka MBoSE Cell kaba pura ha Jowai.

“Ka JSU ha ki jingiaid lynti ia u mawmer ba 50 snem kala ioh iaka jingshaniah jong u paidbah naka bynta ban rah iaka eh ka shon u paidbah ne sur u paidbah sha ka sorkar ha kiba bun ki bynta ban pynioh iaka jingdawa,” la ong u Nujorki Sungoh haba kren haba sdang ka jingrakhe iaka jingdap 50 snem ka JSU haka jingialang kaba long ha District Library Auditorium, Jowai haka sngi Saitjain.

Haba kren shuh shuh ula ong ba ka Rilum Jaintia ka dang duna bad sahdien bha haka ki jaka sumar, ka pule ka puthi bad kiwei kiwei ki kam pynroi lada ianujor bad kiwei.

“Ka jingnang jingstad kadei ka atiar ban ialeh bad lada khlem ka jingnang jingstad ngin nym lah ban wanrah iaka jingkylla,” la ong u Nujorki. Ula ong “da ka jingiatreilang ka JSU bad ki nongmihkhmat ba shisien ka sngi ngin lah ban pynmih iaki khlur ki ban iasaid bad ban synniang naka bynta ka imlang ka sahlang jong ka rilum Jaintia baroh kawei.”

Ha kaba iadei bad ka jingeh ka sor Jowai na u ñiut mynta, ula ong ba ki paidbah kim ai ka jingïatreilang bad kane ka long ka jinglehraiñ ïaka District Headquarter jong ka West Jaintia Hills. Ula khot ïa baroh ki khun ka rilum Jaintia ban don ka jingïatreilang khnang ba ka Jowai kan ioh iaka jaka bret ñiut kaba paka.

Halor u pud u sam haka jaka ba khajia, ha Block-I ula ong ba kadei ka hok nongkynti jong ki Jaintia bad ki nongshong shnong katei ka jaka ruh ki angnud ban kynthup lang iaki hapoh ka Jylla bad kum u nongmihkhmat ula kren ia kane hapoh ka iing dorbar.

U president barim ka JSU ma Garland Rymbai haba kren ula pynkynmaw iaki snem kiba la leit kiba naduh u snem 1987 ka mat kaba hakhliehduh baka JSU ka shim kalong halor ka kam pynbeit ia pud u sam bad ka Inner Line Permit.

Haba kyntu kynpham ïaki dkhot ka JSU, u Ma Rymbai ula ong shwa ban leh ïa kano kano donkam ban pyrkhat jylliew bha bad ban shim iaka ishu da ka jingstad jingshemphang.

Shuh shuh u Treiborlang Suchen General Secretary JSU haba kren ula kren ha kaba iadei bad ki mat ki khynnah skul ne ki samla pule kiba hap ban iakhun iaka CUET. Ula ong ba ka JSU kam lah ban pdiang ïaka CUET namar kan buh jingeh ïaki khynnah pule ka Jylla bad kumba long mynta kam pat biang satia ban pynkylla syndet ïaka rukom pynrung klass ïaki khynnah sha ki kolej lyngba ka CUET namar bun ki khynnah pule sha nongkyndong kim pat da tip shai lane sngewthuh bha kaei kata ka CUET exam bad lada ki tip ruh kan eh ïaki ban thep admission lyngba ka website namar ym baroh ki shnong nongkyndong hapoh ka Jylla ki biang ïaka network Internet.

Kiwei kiwei kiba kren ki klynthup ia u MDC ka Jowai Central u Andrew Shullai, u Bah RL Blah nongïalam ka Synjuk ki nongsynshar Shnong ka Bri u Hyniewtrep, u Rikut N. Pareiñ president barim ka JSU, u Shiningstar Kharbihkhiew Incharge KSU West Jaintia Hill District, u Dondy Cliff Khongsit General Secretary FKJGP Central Body, Satly Ryngkhlem vice president KSU, East Jaintia Hills bad kiwei kiwei.

Ka JSU kala pynkhreh ban rakhe ia kane lyngkhuh snem ba 50 haduh u bnai Nohprah.