500 tynrai thung dieng ka Mukhaialong bad ka tnad Wildlife ha ‘law shnong

Syllad | The Rising MeghalayaJune 4, 2019

JOWAI: Ka Mukhaialong Dorbar Shnong ha ryngkat ka jingïatreilang ka ophis jong ka DFO Wildlife Division, Jowai kala pynlong ïaka jingthungdieng haka ‘law shnong jong ka shnong – ka Mukhaialong Pohblai Community Reserved haka sngi ba ar.

Kane ka jingthung dieng kaba la pynlong da ka Dorbar Shnong Mukhaialong ka dei kum shibynta ban rakhe ïaka World Environment Day.

Wat hapdeng ka jingjur jong u slap ki paid nongshong shnong ka Mukhaialong kila mih paidbah ban thung dieng haduh 500 tynrai ha kaba 200 tynrai la ai da ka DFO Wildlife bad 300 tynrai la pynbiang da ka bor shnong.

Ka Dorbar shnong ka la maham ba ym bit ban thang lum hapoh u pud u sam ka shnong khnang ba ki dieng kin heh kin san hapoh pud u sam jong ka shnong bad ki artylli ki Community Reserved ka shnong.