53 klur yn tei thymmai ia ka Dr. H Gordon Robert Hospital

Syllad | The Rising MeghalayaNovember 26, 2022

U John Barla myntri ka sorkar kmie ba dei khmih ia ka tnat Minority Affairs u la wan ban iuh kjat iaka aspatal bna nam jong ka jylla katta ka Dr H Gordon Robert Hospital haka sngi Palei.

Ha kane ka jingleit jong u Barla, la synran lang ia u da u bah Michael Kharsyntiew u kyrtong ba la pan ia ka tiket ka party BJP ban iakhun na North Shillong Constituency, nangta u bah Clarence Nongbet, State Vice President ba du bah David Kharsati, na kaliang ka aspatal la mih khmat da Medical Superintendent u Dr Nongrum, Rev SS Majaw ba dei chairman ka Governing Board, u Administrative Officer bah KW Marbaniang bad kiwei.

Ha kane ka jingleit u Barla u ai khublei ia ki bor ba dei khmih ia kane ka aspatal kiba la trei shitom bad ban iai pyneh ia ka jingshakri kaba kynjoh ia ka spah snem.

Na ka liang u bah Michael, u la shim lem ia ka bynta ban pyshai sha u Barla haba iadei bad ki jingdonkam kiba kane ka aspatal ka donkam kum ha kaban khreh ban tei ia ka iing ba thymmai ha kaba ka jinglut ka jong ka kam duna ia ka 53 klur tyngka.

Halor kane, u bah Michael lyngba u Barla u buh ia ka jingkyrpad ba un iarap lem ban shim khia ia kane ka jingdonkam jong ka aspatal. Na ka liang u Barla u la pynlut khambun ia la ka jong ka por ka jong u bad ban rung bad khmih ia man la ki jaka ai jingsumar ne ward jong kane ka aspatal khamtam lei lei ka jaka ai jingsumar ba kham paw katta ka European Ward bad kumjuh ban jurip ia ka jaka kaba thmu ban tei ia ka iing sah nam ia u mawmer jong ka shi spah snem, bad dei ha kane ka khep, ba ki bor ba dei  khmih ki la shim ia ka kabu ban batai bad pyni bniah lut hakhmat u Barla ia ki jingdonkam baroh.

Hadien kane, u John Barla ryngkat ka jingia synran lang ka jong u bah Ernest Mawrie ba dei artad u President ka BJP ka Meghalaya bad kiwei kiwei ki dkhot nongkit kam ka party ki la leit ruh ban ia shem bad kynduh ia u Archbishop Fr Victor Lyngdoh ha kaba la don lang ruh Fr Richard Majaw.