6 Acre ka jaka thied ka Mawryngkneng ban tei College

Syllad | The Rising MeghalayaOctober 14, 2020

Ka Dorbar Shnong Mawryngkneng ka la dep ban thied ia ka jaka kaba heh 6 acre ka jingheh ha ka dor 8 lak tyngka ka bynta ban tei ia ka Community College na ka bynta ka jingmyntoi ki samla pule ym tang na katei ka shnong, hynrei ki shnong ba marjan.

Ha ka jingialang ia mir jingmut halor kane ka jingthmu ha ka step Sngi Nyngkong ha Orchid Resort, Mawryngkneng, u Bah Pynïaid Sing Syiem, MDC ka Sohryngkham bad Chairman ka KHADC, da ka jingkmen kum u nongmihkhmat bad shi bynta ban don ka jingiatreilang, u la noh synñiang da ka tulop MDC ba 2 bnai jong u ban ia tynrong lang ban siew ia ka bai jaka. Ka Dorbar Shnong Mawryngkneng ka la don ia ka Community College bad khnang ban ïoh pyniasoh bad ïoh jingithuh na ka skul bah North Eastern Hills University (NEHU) katkum ki kyndon University Grants Commission (UGC) kan hap ban pynkhreh ia ka jaka kaba paka bad biang bha ban tei ia ka College.

Ha ka jingialang ia mir jingmut ha ka jingiadonlang ki nongialam shnong ba kynthup ia u Bah Peter J Lawai, Sordar ka Shnong Mawryngkneng, u Bah Wallambok Kharsati, Secretary, u Bah Devan Nongpluh, Chairman ka Mawryngkneng College Committee bad kiwei pat, u Bah Pynïaid u la ong ba un don ryngkat ban ia trei ryngkat bad ki bor nongialam shnong halor kane ka jingthmu.

“Kham ha shwa nga la dep mang 3 lak na ka skhim MDC ban ai sha ka Mawryngkneng College, hynrei mynta nga ïoh sngew ba phi la dep ia thied ia ka jaka ban tei da ka Community College kaba pura bad nga kum u nongmihkhmat ngan don ban ia ai lang ka kti kamon kadiang ha kino kino ki bynta na ka bynta ka jingthmu. Na ka liang jong nga na ka skhim MDC jong u snem mang tyngka 2020-2021 ngan ïoh ruh shuh shuh ban ai ka jingkyrshan lang ia phi”, la ong u Bah Pyniaid ha ki nongshong shnong.

“Ka dei ba ka Shnong bad ki nongialam shnong hi lem kiba ia don bynta lang ban ïoh ka jingai mynsiem na ka bynta kane ka jingthmu”, u la ong.

U Bah Pynïaid u la pynpaw ruh ba u la dep ia kren bad u Symbud Myntri Rangbah ka Jylla, Bah Prestone Tynsong na ka bynta ka Surok ban pyniasoh na Mawpyrshong sha Mawryngkneng. “Nga khmih lynti ba kan urlong bad u Symbud Myntri Rangbah u shim khia ia kane ka mat”, u la ong.

Na ka liang u Bah Peter J Lawai u la pynpaw ka jingai khublei ia u MDC watla ha ka bor kaba rit hynrei u iai tyllun bad met bad mynsiem na ka bynta ka jingmyntoi ki nongshong shnong hi baroh kawei. “Na ka liang jong ngi kum ka Shnong hi baroh kawei ngi ai ka jingsngewnguh bad khublei kitbok ia u Bah Pyniaid na ka bynta ka jingai mynsiem bad jingïatreilang na ka por sha ka por”, u la ong.

Hadien kane ka jingialang, ka la don ka jingleit jurip ia katei ka jaka kaba don ha ka jaka kaba biang paka bha ha Dong Mission, Mawryngkneng kaba long pdeng na ka bynta ki samla pule bad ka don ruh ka kham jan ban mih sha Shillong Bye-Pass bad na ka surok sha ka Shnong Ksehpyndeng.